Aposel 2:4-22

⁴Hu masih kene, ara Mwoiwan Haiyan iya nondriyahu, pe hupep topwei. Pe Mwoiwan Haiyan iyki nongan iya kili hu, pe huwong iya hu nongna kol handra-handra.

⁵Pe iro mwonen lang ara, yihu Yutah hayah, mepo ngara hu koro pahandra nohowai ta Ngindrai, ara huyau hape-hape husa Yerusalem i. Yihu ara hu ndramira hu kol namandran masih para kol pwan masih kene pahandra yang.

⁶Pe iro mwonen huhulingi ngasa nohai ara, yihu ndramat soyon iya lohongahu indrap pe huhumbuh husa wule, paratesah, huhulingi hu ndramira Yesu, ara huro wong iya nongna kol ata hamou-hamou tahu.

⁷Pe mwoiwahu ihin pe huro lohonge soyon, hupa, “Akahalingiy! Hu masih hutora wong, ara hu ndramira Kaliliy opu, ndre?

⁸Pwen tehen tapeh pe worou hamou-hamou turopo hilingi hutora wong iya ndringe nongna kolorou imwonen?

⁹Worou tuyau kol Partiya, Mitiya, pe Elam. Pe hayah torou ara tuyau te kol namandran hape Mesopotamiya, Yutiya, pe hu kol namandran iya Kapatosiya, Pontus, pe Esiya,

¹⁰pe kol namandran hape Prikiya pe Pampiliya, pe kol namandran masih Yisip pe hu kol namandran hape nondriya kol Lipiya mepo hutora pakeh kol ngawan Sairini. Pe worou hayah, ara tuyau te kol Rom tusa turopo iye hapeko.

¹¹Worou Yutah, iyasura hu Ndramira Lah mepo hutopo tohun husa sura tou, pe worou para mbuson Krit pe kol namandran iya Arapiya, ara worou masih tuhulingi hu, huropo pohowe kinima pwoke ta Ngindrai iya nongna kolorou imwonen.”

¹²Yihu masih mwoiwahu ihin, pe huro lohonge soyon iya. Pwen huro wong mwalingahu, hupa, “Melit mahapo irayah, ara ndroiyin tesah ndrokonan?”

¹³Hapeko yihu hayah tahu ara huro pwasimiri hu, hupa, “Huyin ndrunu wain howen soyon iya pe iringi hu, ndre?”

¹⁴Pwen Pita itine iyasura hu songui pe hamou, pe iwong namandran iya, iya kili hu ndramat, ipa, “Wawu Yutah pe wawu mepo wawu sa ropo Yerusalem, ara akahalingi nokulani sehe melit nakupwai.

¹⁵Wawu mbuna akapa ndre yihu ndramat aripo ara huyin ndran pe hu topo mbui, pwi yoh. Mahapoko mandroulang, pe paramwandrai ara hira mandrosih o.

¹⁶Melit mahapo irayah, ara tehe Poropet Yowel kiniwong pwen mamu kinna aliy:

¹⁷Ngindrai ipwai, ipa, ‘Lang itapo isa kamulan masih, andre kutilingi Mwoiwo kiya kili hu ndramat masih. Pe noru wawu hu kamai pe pihin, ara andre hu kapohowe nongno tehe hu poropet, pe hu wihou tawawu, ara andre hu kanime taltan, pe hu parangoloha wawu, ara andre hu kanihiyani hu nihinih.

¹⁸Pe andre kutilingi Mwoiwo kiya kili hu ndramiro para poya mbulyo, kamai pe pihin, pe andre hu kapohowe nongno tehe hu poropet.

¹⁹Pe yo andre kumbusi hu kinima pwoke handra-handra karayah yang, pe andre kumbusi hu kaipisa melit handra-handra yi karayah koro mbulu pwan, tehe ndrai pe mwan pe kosumwan mabuniyan andre kirayah.

²⁰Pe paramwandrai ara andre kipaiwaniy pe kilokuh, pe walah ara andre kipaiwaniy pe kilam tehe ndrai. Melit masih aro kene, ara andre kirayah kimu kihipwen, kamulan lenge Yapan namandran iya pe nonowan iya, ara andre kisarayah.

²¹Pe hu ndramat masih mepo hu andre kayoh kiya ngala Yapan, ara Yapan andre kisopwat hu.’

²²Wawu ndramira Yisrayel, akahalingi nongan aro; Yesu, ndramira Nasaret, ara Ngindrai ipwandrisa yiy isa pwan mwalinga wawu. Pe Ngindrai imbusi hu ndraikiya pwoke, hu kinima pwoke, pe hu kaipisa pwoke, ara iro ndruwa Yesu. Wawu mbukena wawu kanpahasaniy pwen.