Dad Nimò 2:4-22

⁴Na kdeela tafnò i Mtiu Tulus, na tambù ale talù i dad sahal talù, du mdà di gnagan blé Tulus Dwata dale.

⁵Na nun dad Dyu mnè di Dyérusalém di bang én too mafè Dwata. Mdà ale di kdee dad sahal banwe di tah tanà.

⁶Kaklingela i bong uni ani, too dee di dale stifun déén. Na too ale tikeng, du kat satu dale lingela i dale talù mdà di dad faglut di ku Dyisas.

⁷Na én duenla too tikeng, na manla, “Ise kè i dad to talù ani slame mdà di banwe Galili?

⁸Na tan ku fulung ale talù i gito talù?

⁹Du sahal dad banwe gumdaito. Nun mdà di banwe Farsya, Midya, Ilam, Mésofotamya, Dyudiya, Kafadosya, Fontus, Asya,

¹⁰Fridya, Famfilya, Idyif, na dad banwe di Libya mdadong di Sirini. Na nun dademe dad tlang dini mdà di Roma,

¹¹i dad Dyu na dad to ise Dyu, mgebe di fnaglut i dad to Dyu. Na dademe di gito mdà di Krit na Arabya. Sahal banwe gumdaito, bay knean, lingeito di gito talù gablà di dad mdatah mgimò Dwata.”

¹²Tikeng ale na msamuk i fandamla, taman sasalek ale, manla, “Tan dé gumtatek ani?”

¹³Kabay én dademe baling ale smilo i dad faglut, manla, “E talangal ale.”

¹⁴Na kafnge én, tadag Fiter magin i dademe dad sfalò satu dek Dyisas, na falbongan i taluan, manan, “E dad demegu Dyu, na kdeeyu dini di Dyérusalém, fye ku glabatyu moon, taman tooyu beg fanlinge i mangu di gamu ani.

¹⁵Man nawayu langal i dad to ani bay là ale langal, du neyeyu, alò tngà mnagad i duh.

¹⁶Kabay ani sa kagdohò i tafakang Dwata fagu di satu tugadan di muna fa dunan Dyol, manan,

¹⁷‘Ani sa i nimògu kadang di fulé duh, toogu blé i Tulusgu di kdee dad to. I dad ngàyu lagi na libun tmugad ale i fgadègu di dale, na i dad ngàyu sawang lagi nun kanteenla, na i dad tua lagi di gamu kamna ale.

¹⁸Na balù i dad fasakgu lagi na libun, banlégu ale i Tulusgu, na tnugadla i fgadègu di dale.

¹⁹Na di bang én, fitegu di dad to i dad tnikeng mdà di langit, na dad ilè dini di tah tanà, dunan litè, na lifoh, na buk too mangfel.

²⁰Mbaling kmifu i duh na mbaling fulè i bulen gambet litè. Ani sa mkel di là fa gdohò i mdatah duh, i duh kukum i Amu.

²¹Na di duh én kadang, balù simto mni tabeng di Dwata i Amu, galwà ale.’ ” Én man Dwata fagu di ku Dyol.

²²Na fadlug talù Fiter, manan, “E gamu dad bel Israél, tooyu fanlinge i mangu ani. Tagadèyu gablà ku Dyisas mdà di banwe Nasarét. Tafite Dwata na kenen mdek ku Dyisas, du mdà di gnaganan na dad bong tnikeng na dad ilè fimoan kenen di munayu gufiten i kdatahan.