SAN MARCOS 6:20-32

²⁰Huan Herodes oquimoucaitac in Juan tleca oquimatiyaya yehhuatl se molui cuali tlacatl huan se iconeu in Dios. Huan ic inon oquitzactoya in Herodes ic ahmo tlen maquipano. Miyacpa in Herodes oquitlahtolcaquiyaya in Juan, huan masque ahmo oquinehnehuiliyaya tlen oquiluic, oquipactiyaya quicaquis.

²¹In Herodes oquitlaolichti in itonal inetlacatilis huan oquintlamacac nochin huehhueyi tequihuahmen huan in tlicancamen den tlali Galilea.

²²Huan ocalac ichpocau inon Herodías huan opeu mihtohtiya, huan oquipacti Herodes huan aquin ihuan ocatcahque. Huan in hueyixtoc oquiluic in ichpochtontli: ―Xinechtlahtlanili tlen ticnequis, huan nehhuatl nimitzmacas.

²³Huan oquicaquiltic in Herodes: ―In tlen tinechtlahtlanilis, nimitzmacas hasta in tlahcopa campa nihueyixtoc.

²⁴Huan oquis in ichpochtontli huan oquitlahtlanito in inana: ―¿Tlen nictlahtlanis? Huan inana oquinanquilic: ―Xictlahtlanili itzonteco den Juan Tlacuatequiyani.

²⁵Huan saniman in ichpochtontli omocuep canin ocatca in hueyixtoc huan oquiluic: ―Nicnequi saniman xinechmaca iitzonteco Juan Tlacuatequiyani ihtech se plato.

²⁶Ic inon in hueyixtoc Herodes molui otlocox, huan ipampa itlahtol huan in aquin ihuan ocahcatca, ic inon ahmo oquinec motlahtolpatlas.

²⁷Saniman in hueyixtoc oquititlan se topili macualica itzonteco in Juan.

²⁸In topili oya huan oquiquechtzontec in Juan ompa telpiloyan, huan ocualicac itzonteco ihtech se plato. Huan oquimacac in ichpochtontli, huan yehhuatl oquimacato inana.

²⁹Queman in itlamachticahuan den Juan oquimatque inon, oyahque quianahque itlacayo, huan oquitocaque ihtech se tlaltecochtli.

³⁰Omocuepque in tetiotlatitlaniluan in Jesús canin oquinchiyaloc huan oteiluihque nochin tlen oquinchiuque huan tlen oquinextilihque in tlacamen.

³¹Huan Yehhuatzin oquiniluiloc: ―Matimoxelocan san tehhuan ipan se tlali huehca huan ompa timosehuisque chihton. Ijcon omihto tleca miyacten oteahsiyayahque huan oquisticatcahque. Huan ic inon niyan ahhuel otlacuahque.

³²Huan oyahque ihtech se barco huan oahsitohque ipan se sacatlahtli canin ahmo aquin ocatca.