San Marcos 5:23-36

²³itsanque pato duque rocainue: —Lachi namari puyachinae. Nuri yaca tedechi tale quito manse suwabi jisa! tinue yape manseito mansonnasa.

²⁴Junni Jesuri ya Jáirobe pejinasa, duque tsachila pejinaminlanue. Duque dilapun jominue.

²⁵Junnasa quiyanpun sona manca pejominue. Ya sonari chunca palu watale nechi ma cura luban quirato nenamin sona jominue.

²⁶Duque padeseito nenamin jominue. Yacari monantiya manseno podeitumin jominlanue. Duque janpeinatotiya nantanan inamin jominue. Calaca jera castainaminue. Titiya tanunca jera iton inaminue.

²⁷Junto Jesuca meraca joto, ya sona nosasa Jesuchi bene nanchi nechi jato yachi camisa puntale taquiranue.

²⁸Duque quiyanpun jotonan, Jesuchi camisacatiya taquirasiri manseiyanaeque tenca canue.

²⁹Junni Jesuchi camisa puntale taquiranasaleri, luban quirananun mandeinue. Junsi yachi pucabi tenhinue quiyanpun jomin manseiyoeque.

³⁰Junni Jesuri yachi sonbabe tsachi mancaca manse suwayoeque tenhito, bene nanchi manquiraereto panhanue ¿Mo lachi camisaca taquiran? tito.

³¹Junni yabe penenaminlari itsanlatinue: —Nuri ichiricari tsachilachi quitsabi joe. ¿Junni niyaito ¿Mo taquiran? tinayun? tilatinue.

³²Junni Jesuri piyanlelaca jera quiranue mo yaca taquiraca jonunca miichun.

³³Junnasa ya sonari jelechi jowinpode Jesúchile jasi telenhito, tsarasica jera paniquinue.

³⁴Junni Jesuri ya sonabe itsantinue: —Nama, nuri laca tsarasi tennato manseinue. Pansi manjiniide! tinue. Nuchi quiyan jera manseica joe tinue.

³⁵Junni Jesús ya sonabe cacuenta quinasanan, Diosichi fiqui miinun yabi mantaminchi yabi nechi tsachila jalainue. Junto ya tsachilari nachi apabe itsantilatinue: —Nuchi namari numa puyae tilatinue. Junto Miya Jesuca jasa carituntsan joe tilatinue.

³⁶Junni Jesuri ya tsachila tsanlatinunca natiya tennatuto, ya nachi apaberi itsantinue: —Natiya jeleratude! Quereicachiri seque quereide! tinue.