Marko 5:23-36

²³Iua iteene amanaãri Xesosi: —Namarite opinanapanoka. Masa notakata. Pitakari piuako oa nopini erekape onini ĩkapani.

²⁴Ininiã Xesosi sari iuakata. Kãkiti kinapokope itxakata isinina.

²⁵Iuasaaki sito amianatakaro apoka. Tosikanani oa arẽka !iotoka.

²⁶Okinika otxineiroteẽ oĩkitxitapekari oamianare imarotakani. Kaiãopokori ipitamaro. Txamari ninoa !iposotari imakatxakinirina oamianare. Kona erekaro. Apiata oamianare.

²⁷Okenakoenetakasaakiri Xesosi napini, osari iuamoni. Omaãtakari imãka,

²⁸kotxi oamoni: “Nimaãtakiniãri imãka, iuasaakiika erekapekano,” otxanãta oxinikakiti.

²⁹Ininiã omaãtakasaakiri, oarẽka iotoka. Iuasaakipeka oimarotari erekape onini.

³⁰Iuasaakiika Xesosi posotiire sari oamoni. Ininiã ikirioka kãkiti sauaki. Eereka ipimaãna: —Kipa maãtakatari nimãka? —itxa.

³¹Iuasaaki imoianariakori apakapapiretari: —Apiananiri, patamata. Itomaneri kãkiti kinapokopeka, iuaritika pite pimaãri kãkiti: “Kipa maãtakatano?” pitxa —itxana.

³²Iuaritika Xesosi nitari imãka maãtakakari.

³³Iuasaaki oa sito imarotari erekape onini, ininiã okapotoreẽkaua iuamoni. Opĩkarauata. Okikinanaka. Eereka osãpiretari ikinika oamianare iuamoni.

³⁴Ininiã Xesosi txaro: —Namarite, pite erekapekai uatxa, kotxi pauikari niposotiire. Pisipiniikaua, erekaxinirepekai —itxa Xesosi.

³⁵Xesosi sãkirauatakasaaki oakata, apanakini Xáiro nitiriakori apoka. Itxari: —Pamarite !auaika. Opĩpeka. Pauiritari Xesosi kanapiriini.

³⁶Ininiã Xesosi !imaãkatari ikara pirena. Itxari Xáiro: —Kona pipĩkarauatape. Pauikano —itxari. Ininiã ninoa sari Xáiro aapokomoni.