San Marcos 5:23-36

²³na' benyesh'chgue', chi'e: ―Ba chet bi' c̱ha'na'. Ben goklen sho'gach wx̱oa noona' yic̱hjbaa kwenc̱he yiyakib' na' ibanchb'.

²⁴Na' wyajlen Jesúza' ḻe', na' beṉ' zan inlleb nogake'ne' ax̱t bdakwyillgake'ne'.

²⁵Na' ladj beṉ' zan walka' len to noolə ba gok shlliṉ yiz chzoe' wbaa.

²⁶Dii zan dii ba ben ble'ile' lao beṉ' wen rmechka', na' ba blliayee yog' dii de c̱he' na' bi gokkze' rmech, san gokxinlile'.

²⁷Na' ka benile' xtill' Jesúza', jṉi'e ladj beṉ' zan walka' no ḻe' na' jex̱ee xe'na'.

²⁸Ḻa' gokile': “Ḻa'c̱h' xe'na' sheḻ' ba bex̱aa, na' yiyakid'.”

²⁹Na' katena' wlez wbaana' na' gokbe'ile' ba bigaa yillwe' c̱he'na'.

³⁰Na' gokbe'i Jesúza' bchej yeḻ' wak c̱he'na', na' biyec̱hje' chi'e beṉ'ka': ―¿Noran bex̱' xa'na'?

³¹Na' beṉ'ka' non ḻe' txen che'gake'ne': ―Beṉ' zan walan ndakwyill li'. ¿Bic̱he nazo': “Non ba bex̱' nad'”?

³²Na' ze Jesúza' chwie' beṉ'ka' lle' kwite'na' kwenc̱he iṉezile' non bex̱' ḻe'.

³³Na'ch noola', daa ba gokbe'ile' biyakile', de chall chllebzile' wdie' na' bc̱hek' xibe'na' lawe'na' na' golle' ḻe' doxen daa ba gok c̱he'.

³⁴Na' che' Jesúza'ne': ―Xiiṉ', daa chonḻilalloo nadaan ba biyakilo'. Biyaj mbalaz daa ba bigaa yillwe'na' bsak'zi' li'.

³⁵Na' ni chshaljte Jesúza' ka bllin to c̱hop beṉ' wza' lill Jairona', chi'ene': ―Ba wit bi' c̱ho'na'. Bich gonilo' maestroni zed.

³⁶Na' bi ben Jesúza' ḻegake' kwent, na' golle' Jairona': ―Bi illebo'. Kon bx̱enilall' nad'.