San Marcos 5:18-41

¹⁸Jesús if'ajna'ma al barco, ti'huana'ma. Cal xans li'ipa ƚitsufaipa contahue tixa'hue, timi: ―Aƚƚecoƚa' jouc'a.

¹⁹Jesús aiquepi'i' lane. Timi: ―To'huanƚa' lomejut'ƚ, jiƚpe lomana' lopimaye. To'itsola' al cueca' li'e'epo' ȽanDios. Tomitsola' te ts'i'ic' liximpo' cuanuc'.

²⁰Cal xans i'huana'ma, itsehuo'ma petsi lecui'impa: Limbamaj Quiƚeloƚya'. Jiƚpiya u'i'mola' lan xanuc' li'e'epa Jesús. Lan xanuc' ixim'me acueca' li'epa Jesús, ixpailij'mola'.

²¹Jesús iquiecona'ma al cuecaj quin'nuhua'. Licuaiyocontsi al barco ƚocuena ƚema, icuaitsa axpela' lan xanuc', efot'ƚe'moƚtsi anuli Jesús ƚema caja.

²²Jiƚpiya icuaitsi anuli cal xans ipenic' lajut'ƚ pe lafoƚyomma lan xanuc'. Cuftine Jairo. Lixim'ma Jesús, exc'onƚingai'ma li'mitsi',

²³tixa'hue juaiconapa, timi: ―Ƚai'hua cahuats' juaiconapa textafque. Timana'ma. Ƚepá. Ma le'a toxpayaf'ta lomane, toxaƚ'menna, ti'hua tipajnla'.

²⁴Iye'me Jesús jouc'a Jairo. Axpela' lan xanuc' ihuej'me. I'i'mola' atansca, titantsinni Jesús.

²⁵Jiƚpe tipa'a anuli ƚaca'no' textafque. Imbamaj coque' camats' ti'hua cajuats' licu'u.

²⁶Iteƚcopa juaiconapa. Axpela' lin'e'ehuale cafxi iteƚ'mipá. I'najtsepola' iƚniya, joupa ijou'nenapa li'hueca. Aiquixaƚma. Ti'hua titsípa licuana. Iƚque ƚaca'no' icuejpa lo'epa Jesús.

²⁷Nolojmay xanuc' iƚoc'huaipa lixpula' Jesús. Iƚafc'e'e'ma lipijahua'.

²⁸Iƚque tinesqui lipicuejma': “Ma le'a lipijahua' caƚafla', toƚe aƚsaƚcona'ma”. Tot'ƚiya iƚafc'e'epa lipijahua' Jesús.

²⁹Aiquicoƚ'ma, ipanenni licu'u. Ixim'moxi ixaƚconapa. Aimiteƚcoconaya.

³⁰Aiquicoƚ'ma, Jesús ixingufco'ma lipaxi ixaƚ'meyalepa. Ipai'e'moxi nolojmay xanuc', icuis'e'mola', timila': ―¿Naitsi ƚaƚ―lafpa?

³¹Ts'ilihuequi italai'e'e'me, timiyi: ―Ima' oxina' jifa'a axpela' lan xanuc' titantsihuo', ¿te cofmicuitsufcopa: “¿Naitsi ƚaƚ―lafpa?”?

³²Jesús ti'hua tehuetsale ƚijuihuay. Tehuay naitsi iƚque ƚiƚafpa.

³³Ƚaca'no' tixpaiqui juaiconapa, tiyu, iximpoxi ailopa'a quicuana. Iƚoc'huai'ma, exc'onƚingai'ma li'mitsi' Jesús. Imi'ma Jesús al ƚinca. Tuya'e' te ts'i'ic' lixaƚconapa, timi: ―Aiƚafpo' lopijahua'.

³⁴Jesús timi: ―Mai'hua, aƚ'huaiyijmpa, toƚiya ixaƚconapo'. Aimoxhueƚmot'ƚe'ma. Iƚe al cuana aimiteƚ'miconayaco'.

³⁵Ma mipalaic'o ƚaca'no', icuaiyunca lan xanuc' quiyouyomma lejut'ƚ Jairo, iƚque ts'ipenic' lajut'ƚ pe lafoƚyomma lan xanuc'. Timiyi Jairo: ―Joupa imanapa ƚo'hua. ¿Te ti'hua cofxoc'icoya ƚomxi?

³⁶Jesús icuej'ma lu'impa Jairo. Timi: ―Aimixpaij'mo'. Ma le'a aƚ'huaiyijnla'.

³⁷Jesús ileco'mola' Pedro, Jacobo, jouc'a Juan, iƚque ipima Jacobo. Timila' locuenaye xanuc' aimiyoucu.

³⁸Icuaitsa lejut'ƚ cal xans, iƚque ts'ipenic' lajut'ƚ pe lafoƚyomma lan xanuc', Jesús ehuelojm'mola' lo'epa lan xanuc', tijolijyi, tija'ayi.

³⁹Itsufai'ma lajut'ƚ, timila': ―¿Te coƚja'acopa? ¿Te coƚjolijcopa? Ƚahuats' aiquimac', ma le'a tixmay.

⁴⁰Aiquiƚ'aic' ƚinca. Ma le'a ixoco'me. Jesús timila': ―Jahuay imanc' tolipalunca. Ileco'mola' qui'ailli', qui'máma' ƚahuats', jouc'a lam fantsi ts'ilihuequi. Itsuflai'me pe lonouya ƚahuats'.

⁴¹Jesús i'noƚ'e'e'ma limane ƚahuats', timi: ―Talitá kumi. (Iƚe lataiqui' lohuaƚquemma ticua: Macahuats', camihuo', totsahuenni.)