San Marcos 5:18-41

¹⁸Catiꞌ bubenëꞌ Jesús lëꞌi bárcodauꞌ, bönniꞌ naꞌ ziꞌal yuꞌugac lëꞌ böꞌ xöhuiꞌ zian, gútaꞌyuëꞌ lahuëꞌ Jesús guꞌë lëꞌ latj tséajlenëꞌ Lëꞌ.

¹⁹Jesús cutu bëꞌë lëꞌ latj, san gudxëꞌ lëꞌ: ―Böaj lidxuꞌ. Yajtixjöiꞌ yuguꞌ diꞌa dza quiuꞌ yuguꞌ le zxön benaꞌ quiuꞌ nedaꞌ, nacaꞌ Xanuꞌ, len ca benaꞌ buechiꞌ ladxaꞌa liꞌ.

²⁰Zhuöjëꞌ bönniꞌ naꞌ, ruzë́ꞌ didzaꞌ yuguꞌ yödz Decápolis ca nacgac le zxön benëꞌ queëꞌ Jesús, atiꞌ gulubani yúguꞌtë bunách nacuáꞌ yuguꞌ yödz niꞌ.

²¹Catiꞌ budxinëꞌ Jesús yetsláꞌa nis zxön naꞌ, niꞌr guludúb bunách zian ga naꞌ zoëꞌ raꞌ nis zxön.

²²Bidëꞌ caꞌ ga zoëꞌ Jesús bönniꞌ lëꞌ Jairo, bönniꞌ rna bëꞌë lu yuꞌu ga tuꞌdubëꞌ tuꞌsëdëꞌ queëꞌ Dios bönniꞌ judío. Catiꞌ bléꞌinëꞌ Jesús, buzechu zxibëꞌ lahuëꞌ

²³len szxöni gútaꞌyuëꞌ lahuëꞌ, rnëꞌ: ―Chraqui gatbiꞌ biꞌi nguldauꞌ quiaꞌ. Gda gxoa naꞌu lëbiꞌ quië huöacbiꞌ len cui gatbiꞌ.

²⁴Zéajlenëꞌ lëꞌ Jesús, atiꞌ zjaclen Jesús bunách zian, tuꞌquír Lëꞌ.

²⁵Zoanu caꞌ niꞌ ngul, chnac chinnu iz réꞌinu, cutu ruhuíꞌi rön queënu qui huëꞌ quégaccznu ngul.

²⁶Szxöni chgzxacaꞌ gdiꞌnu lu naꞌquëꞌ zian bönniꞌ tuꞌún bunách. Daduz chbutönu dëra le dë queënu, cutu bi guclen lënu, san ryaliꞌ queënu.

²⁷Catiꞌ byö́ninu tuiꞌ didzaꞌ bunách ca nac queëꞌ Jesús, gdödnu ladjl bunách zian naꞌ, bdxinnu zacaꞌ cúdzuꞌlëꞌ Jesús len gdannu lariꞌ nacuëꞌ.

²⁸Cni bennu le rnanu: “Chquiꞌ canzaꞌ le nacuëꞌ, huöacaꞌ.”

²⁹Laꞌ buiꞌtë rön queënu atiꞌ ráquibeꞌinu chböacnu qui le guc queënu.

³⁰Laꞌ gúquibeꞌitenëꞌ Jesús ben dxin yöl‑laꞌ huac queëꞌ, atiꞌ bueycjëꞌ, ruyúëꞌ bunách zian naꞌ, rnëꞌ: ―¿Nuzxa naꞌ gdan nedaꞌ?

³¹Niꞌr tëꞌ Lëꞌ bönniꞌ daꞌquëꞌ Lëꞌ, taꞌnë́ꞌ: ―Rléꞌicznuꞌ bunách zian ni tuꞌquír Liꞌ, len rnatsuꞌ: “¿Nuzxa naꞌ gdan nedaꞌ?”

³²Ruyúëꞌ Jesús gdu cuitiëꞌ quië gléꞌinëꞌ nuzxa naꞌ gdan Lëꞌ.

³³Niꞌr gbígaꞌnu lahuëꞌ ngul naꞌ, rádxinu len rzxiznu le chnö́zinu bi naꞌ guc queënu, atiꞌ buzechu zxibnu lahuëꞌ Jesús, len gudxnu Lëꞌ gdutë le nacz.

³⁴Jesús rëꞌ‑nu: ―Nguldauꞌ. Chböacuꞌ le réjlëꞌu nedaꞌ. Böaj lidxuꞌ gdu ladxuꞌu. Tsaz nuhuöacuꞌ qui le guc quiuꞌ.

³⁵Tsal niꞌ ruꞌë cni didzaꞌ Jesús, guladxín niꞌ nup narujgac lidxëꞌ bönniꞌ naꞌ rna bëꞌë lu yuꞌu ga tuꞌdubëꞌ tuꞌsëdëꞌ queëꞌ Dios, len tëꞌ bönniꞌ naꞌ: ―Chgutbiꞌ biꞌi nguldauꞌ quiuꞌ. Cutur upizxjnuꞌ Bönniꞌ Usëdi.

³⁶Cutu bëꞌ ladxëꞌë Jesús lë naꞌ taꞌnë́ꞌ, atiꞌ gudxëꞌ bönniꞌ uná bëꞌ naꞌ, rnëꞌ: ―Cutu gádxinuꞌ. Gyéjlëꞌzëꞌ Dios.

³⁷Cutu bëꞌë latj Jesús tsjaclen Lëꞌ yezicaꞌr bunách, san légaczëꞌ Pedro len Jacobo, len Juan, böchëꞌë Jacobo naꞌ.

³⁸Catiꞌ bdxinëꞌ lidxëꞌ bönniꞌ naꞌ rna bëꞌë ga tuꞌdubëꞌ tuꞌsëdëꞌ queëꞌ Dios, bléꞌinëꞌ rac rusbö́ lencaꞌ nup niꞌ taꞌbö́dx len nup taꞌbö́dx yechiꞌ.

³⁹Gyaziëꞌ Jesús len gudxëꞌ lequëꞌ: ―¿Bizx quië runliꞌ rusbö́ len rbödxliꞌ cni? Cutu natbiꞌ biꞌi nguldauꞌ ni. Raszbiꞌ naꞌ.

⁴⁰Niꞌr gulutitjëꞌ Jesús san Lëꞌ bubijëꞌ niꞌl yúguꞌtë bunách naꞌ atiꞌ bchëꞌë xuz xnaꞌbiꞌ biꞌi nguldauꞌ naꞌ lencaꞌ nup nacuaꞌlen Lëꞌ, gyaziëꞌ ga naꞌ dëbiꞌ.

⁴¹Gdel‑lëꞌë naꞌbiꞌ biꞌi nguldauꞌ naꞌ len gudxëꞌ‑biꞌ: ―Talita, cumi. Didzaꞌ ni rna lu didzaꞌ xidzaꞌ: “Biꞌi nguldauꞌ. Gyas.”