San Juan 19:1-24

¹Chiyru gunabee Pilat idaaz Jesús.

²Ax banchuuza de suldadqui tuby curon guɨ́ch guluudeb quiany. Ne bguacudebny tuby lady murad

³Chiy gubigaxdeb nez lony rniigadeb: —¡Su ibány Rey xte Israel! Ax régadeb lony.

⁴Pilat gubíi bdiiab, ax raipbɨ de bniety Israelqui: —Gulguiaa, acuiiab te par gacbeet dec quɨt xi xfaltib rdxiala.

⁵Chiyru bdiia Jesús cun curon guɨ́chqui quiany ne cun lady murad ni bguacudebny. Ax gunii Pilat: —¡Ab rén!

⁶Chiy de bxoz ni rnabee de bxoz cun de ni rcualo yudoroo xte Jerusalén, chi gunádebny guzulo rbɨxtiadeb: —¡Bcuaabiub lo cruzy! ¡Bcuaabiub lo cruzy! Chiy raipy Pilat laadeb: —Laat gulchanéb dxa ne gulcuaab lo cruzy, te nare quɨt xi xfaltib rdxiala.

⁷Per de bniety Israelqui cuaibdeb: —Dunnɨ rdxapnɨ tuby ley, ne pur leyqui laab rquiiny gatybɨ pur ni rniib náb Lliin Dios.

⁸Deni bindiag Pilat ziy quesentiand bdxibbɨ.

⁹Chiy biiub láani palacy stuby ax gunabdiidxbɨ Jesús: —¿Calíll zoo? Per Jesús xíteete quɨt nicaibtiny.

¹⁰Chiy raipy Pilat laany: —¿Ta quɨt icabiu luaa? ¿Ta quɨt gannu dec nare napa guelrnabee par inabiia icoo lo cruzy, o par ildázaca liú?

¹¹Chiyru cuaby Jesús: —Xíteete guelrnabeeti quɨt niaptibiu luaa, belati quɨt ninɨɨdx Diosni laabiu. Pur ningui, ni baany entriagu nare lobiu, mazru napbɨ duld que laabiu.

¹²Parzi desde horqui guzulo rguíily Pilat nez par íldab Jesús. Per de bniety Israelqui gurɨxtiadeb: —¡Belati ildábiub gati xmiguti rey César laabiu! ¡Te pur tutix ni rnii ná Rey, contrɨ rey Césariy runbɨ!

¹³Chi bindiag Pilat ziy, gubíi guléeb Jesús. Ax gurib lo xquiallilbɨ tuby lat rut lá Gabata cun diidx hebreo, zelo diidxqui lo pati ni aguczaac.

¹⁴Ne dxiqui ná visprɨ laní pascu, ax anste laidxi raipy Pilat de bniety Israelqui: —¡A Rey xtentɨ rén!

¹⁵Per laadeb gurɨxtiadeb: —¡Su gatybɨ! ¡Su gatybɨ! ¡Bcuaabiub lo cruzy! Chiy raipy Pilat laadeb: —Per, ¿ta icuáa rey xtentɨ lo cruzy? De bxoz ni rnabee cuaibdeb: —Quɨtllɨru tu Reyti rdxambeen. Tubyzi rey César rdxapnɨ.

¹⁶Chiyru gunabee Pilat icany lo cruzy.

¹⁷Ax bdianédeb Jesús, nuaany cruzy, par zénedebny rut lá Calver ne cun diidx hebreo ax lá ruy Gólgota.

¹⁸Ruy bcuaadebny lo cruzy, cun stiop bniety, tubygadeb tuby lad chiy Jesús glay.

¹⁹Pilat gunabeeb bcuaadeb quia xcruzyny: JESÚS DE NAZARET, REY XTE DE BNIETY ISRAEL.

²⁰Zieny bniety Israel biildy letrerqui, te pur gax Jerusalén bcuaadeb Jesús lo cruzy. Ne cun letrerqui bcuaadebni cun diidx hebreo, cun diidx griego ne cun diidx latín.

²¹Parzi ax raipy de bxozroo xte Israel Pilat: —¿Xínii bcuaabiu: “Rey xte de bniety Israel?” Güenru bcuaabiu: “Ni rnii ná Rey xte de bniety Israel.”

²²Per Pilat cuaibbɨ lodeb: —Ni a cá, a cá, ziy aríianni.

²³Chi gulull bcuaa de suldadqui Jesús lo cruzy, ax cuáadeb xabny baandeb tap ldaa par bgaaizni lodeb. Per stuby xabny ni lá túnica, cun quɨt calí diibtini

²⁴parzi raipy de suldadqui saadeb: —Quɨt idillaatinni. Güenru idzɨtnɨ dád quiani par dún tú yáldni. Ziy xquel guzub zec ni cá lo xquiits Dios rut rnii: “Gudiizdeb xaba, ne guzɨtdeb dád quia túnica xtena.” Ziguiy ná ni baany de suldadqui.