JUAN 19:1-24

¹Xjats ja Pilato ojts tna̱nkmyachɨ ja nwɨndsønꞌa̱jtɨm Jesús, jøts ja ojts tna̱nkwyøpyɨ.

²Jøts ja solda̱dɨ ja ojts ttagujandɨ tuꞌuk ja wɨndsøn kujan, jøts tum kujp awiity, jøts tsuuꞌnk wet ja ojts ttaxoxtɨ.

³Jøts ja ojts wɨngon twɨngunøjkxɨdɨ, jøts ja ojts tnøjmɨdɨ: ―¡Møj mets, pøn ja israelɨt ja̱a̱ꞌy wyɨndsøn ukmayɨp! Jøts ja ojts twɨngoxtɨ tjøpkoxtɨ wyemp yꞌa̱m.

⁴Wɨnets ja Pilato ojts jadɨgojk pyɨdsimy, jøts ja ojts ñɨɨꞌmxyɨdɨ: ―Ejxtɨ nɨja̱wɨdɨ, nyikpɨdsimpy øts yø ya̱ jøts xnɨja̱wɨdɨt jøts ku øts yø nɨti ngadapøkyꞌixy.

⁵Jøts ja nwɨndsønꞌa̱jtɨm Jesús pyɨdsɨɨmy, ɨxam tkujanꞌaty ja kujp awiity jøts ja tsuuꞌnk wet ja twetꞌaty. Jøts ja Pilato ja ojts ñɨma̱a̱gyojmɨyɨdɨ: ―¡Ɨxya̱ døꞌøn ja ja̱a̱ꞌy!

⁶Xjats ku ja teetywɨndsøndøjk ja tꞌejxtøø jøts ja tsa̱pta̱jk, wɨnets ja tjanchtaya̱jxɨdøø møkꞌampy: ―¡Yikruspat! ¡Yikruspat! Jøts ja Pilato ja tnɨma̱a̱y: ―Wa̱wdɨ jøts mee xyikruspat, kumɨ kaꞌap øts yø ti pøky ndapøkyꞌixy.

⁷Yɨdeꞌen ja israelɨt ja̱a̱ꞌy ja yꞌadsoojɨyøø: ―Jap øøts tuꞌuk ja kutujk nmøødɨ, jøts jadeꞌen ja tyikutuky jøts wan tꞌøøky, jaꞌagøjxp ku yø tø ñabyɨkta̱ꞌa̱gyɨ Dios Uꞌngɨn.

⁸Xjats ku ja Pilato ja ojts jadeꞌen tmadøy, jøts ja jadeꞌen yja̱a̱ktyimyikꞌadsøꞌjkɨyɨɨꞌñ.

⁹Jøts ja jap kyutujkta̱a̱jkjøtpy tyøjkɨyɨɨꞌñ jadɨgojk, jøts ja ttɨɨbyɨjky ja nwɨndsønꞌa̱jtɨm Jesús: ―¿Mets, ma̱ mdsøøñ? Jøts ja nwɨndsønꞌa̱jtɨm Jesús nɨwɨneꞌenɨn ja tkidyimyꞌadsøøy.

¹⁰Wɨnets ja Pilato ja ojts ñɨɨꞌmxyɨyɨ: ―¿Jøts ø kaꞌap xꞌadsøy? ¿Ti kaꞌ xnɨja̱wɨ jøts ku øts kutujk njagyepy, jøts me nyikruspatt uk jøts me nyikꞌawa̱ꞌa̱tspɨdsøꞌømt?

¹¹Jøts nwɨndsønꞌa̱jtɨm Jesús ja tꞌadsøøy: ―Ti kutujk mets jeexyɨp mdsaachjagyejpy ku Dios Teety ja jeexyɨp jadeꞌen tkayikjaty; paty jaꞌ møj pøky tyimdyaja̱ꞌa̱dyɨ pøn øts ya̱ tø xkøyaky jøts me tø nyiktagødøkɨ, waanɨ mets mjaꞌ mdaja̱ꞌa̱dyɨ.

¹²Wɨnets ja Pilato nay jatyɨ tjaꞌɨxa̱a̱y ja ta̱a̱y, jøts ja tꞌɨxma̱tst jadiꞌiñɨ ja nwɨndsønꞌa̱jtɨm Jesús; xjats ja israelɨt ja̱a̱ꞌy ja møkta̱ꞌa̱ky ñɨma̱a̱jyɨyɨ: ―¡Pønɨ myikꞌawa̱ꞌa̱tspɨdsimpy ɨnet, kaꞌ xmɨguꞌugɨ wyɨnaty ja møj wɨndsøn César jam Roma! ¡Pøn jadeꞌen namyøjpɨkta̱a̱jkɨp, myɨdsepꞌatpyts ja César!

¹³Xjats ku ja Pilato jadeꞌen tmadøøy, wɨnets ja ojts tna̱nkyikpɨdsimyɨ ja nwɨndsønꞌa̱jtɨm Jesús jøts ja yꞌɨxa̱a̱jky jam kyutujkta̱a̱jkjøpꞌa̱m midi yiktejp Gabata ku hebreɨt ayuujk, jadeꞌen ja tijy ma̱ tsa̱baꞌkxy.

¹⁴Jaa døꞌøn ja xøøw wyɨnaty kujky ku wyɨnaty tyimbya̱tnɨ ja pa̱skɨ. Wɨnets ja Pilato tnɨma̱a̱y ja yja̱a̱ꞌy midi jamdɨ: ―¡Ɨxya̱a̱dɨ ja mwɨndsøn!

¹⁵Yɨdeꞌen ja møk wya̱ndøø: ―¡Wan tpaꞌøøky! ¡Wan tpaꞌøøky! ¡Yikruspat! Jøts ja Pilato ja tnɨma̱a̱y: ―¿Øts ndejɨn ja mwɨndsøn nyikruspatp? Ja teetywɨndsøndøjk ja yɨdeꞌen yꞌadsoojɨyøø: ―Kaꞌap øts pøn jaduꞌuk nwɨndsøn midi øø nwɨndsønꞌajtpy, jaꞌayɨ tuꞌugyɨ ja møj wɨndsøn César.

¹⁶Ku ja Pilato jadeꞌeñɨ yiknɨma̱a̱y, jøts ja ojts tkøyaky ja nwɨndsønꞌa̱jtɨm Jesús jøts ja tyikruspattɨt, wɨnets ja tyiktsoꞌondøø.

¹⁷Xjats ja nwɨndsønꞌa̱jtɨm Jesús tyiktsoꞌondøø, jøts ja ttuka̱ptɨ ja kyɨrus, jøts ja jam ñijkxy ma̱ ja et yiktijy Ooꞌkpɨ Kyuba̱jk Pa̱jk, midi yiktejp hebreɨt ayuujk Gólgota.

¹⁸Jamts ja ojts tyikruspattɨ møøt namajtsk pøkyja̱a̱ꞌy, tuꞌuk jaty ja yikpɨkta̱ktøø adsow aduuk, jøts ja nwɨndsønꞌa̱jtɨm Jesús agujkꞌajpy.

¹⁹Jøts ja Pilato jam ojts tna̱nkpyɨkta̱ꞌa̱gyɨ ja letrɨ kruskøjxp midi nømp: “Jesús, Nazaretɨt ja̱a̱ꞌy, israelɨt ja̱a̱ꞌy wyɨndsøn.”

²⁰Jøts may ja̱a̱ꞌy ojts tꞌejxtɨ ja letrɨ, pø ka̱jpwɨngonxɨ ja jam ma̱ ja nwɨndsønꞌa̱jtɨm Jesús ojts kyɨruspety, jøts ja letrɨ jadeꞌen ja kyøxja̱ꞌa̱yɨ hebreɨt ayuujk, jøts griegɨt ayuujk, jøts latín.

²¹Paty ja israelɨt teetywɨndsøndøjk tnɨmaydɨ ja Pilato: ―Kidi jadeꞌen xja̱ꞌa̱y “Israelɨt ja̱a̱ꞌy wyɨndsøn”; neꞌegɨ jadeꞌen xpɨkta̱ꞌa̱kt “Køꞌøm ñadyijyɨyɨ jøts ku israelɨt ja̱a̱ꞌy twɨndsønɨ.”

²²Yɨdeꞌen ja Pilato ja ojts yꞌadsøyɨdɨ: ―¡Midi tø nja̱ꞌa̱y, jadeꞌen yø tya̱ꞌa̱nt!

²³Xjats ku ja solda̱dɨtøjk wyɨnaty tø tyikruspattɨ ja nwɨndsønꞌa̱jtɨm Jesús, wɨnets ja ojts twejtsjøꞌjkɨdɨ ja wyet, jøts ja ojts ñadyanɨpa̱a̱dyɨdɨ jøts ja ñawya̱ꞌkxɨt makta̱xkpiky, kɨtuꞌuk ja solda̱dɨ ja tpøktɨt. Jøts nayɨdeꞌen tnɨxa̱jɨdyøø ja nɨjan, jøts kumɨ kaꞌats ja yꞌaxuumyukyɨ, jaꞌayɨ ja amuum tyimdyukojkubetyɨ,

²⁴xjats ja solda̱dɨ nɨxem nɨya̱m ñawya̱jnɨdøø: ―Kaꞌ yø ndakøꞌøtsaꞌant; neꞌegɨ yø nnɨguya̱jtɨnt, jøts nꞌejxɨnt pøn jadyimyꞌuktaja̱ꞌa̱dɨp yø wet. Jøts jadeꞌen ojts kaꞌpxy yjaty sa̱m jap jaabyety nøkyijxpy: “Tø øts nwet ja xwejtswa̱ꞌkxɨdɨ, tø ja tnɨguya̱ttɨ.” Jadeꞌents ɨdøꞌøn ja solda̱dɨtøjk yꞌadøtstøø.