SAN JUAN 19:1-24

¹Ngolo tataa ndxab ryete mèna loo Pilat, mnibe' Pilat loo solndad par ya ta' solndad che'n Jesús.

²Látha, mdub solndad thìb coron yis co' nayà' yéc Jesús. No mtegoc solndad Jesús thìb cap co' ngòc lar' morad.

³Ngoloa, mbez solndad loo Jesús: ―San, Rey che'n mèn nación Israel. No be' taa nguis solndad rloo Jesús.

⁴Le' sya, mbere Pilat. Ngro' Pilat par fuer tedib vez. Ndxab Pilat loo mèna: ―Hui' gu' nexa. Trè' ndal non mbi' loo gu' par ta' gu' cuent no ñee gu' yende chó xquin mbi' co' ndxàp mbi' ndryo xo'f loon.

⁵Sya, ngro' no Pilat Jesús par fuer. Ndub coron yis yéc Jesús. No noc Jesús thìb cap co' nac lar' color morad. Ndxab Pilat loo mèna: ―Aa gu' mbi' ndxè'.

⁶Per co'se' gunèe jef che'n nguley' co' más ñibe' loo rye nguley' no mèn nac zin' co' nquenap templ nde no Pilat Jesús, mtlo mèna, ngrozèe mèna cabii. Ndxab mèna loo Pilat: ―Fque' mbi' ba' loo cruz. Fque' mbi' ba' loo cruz. Per Pilat ndxab loo mèna: ―Be' gu' mbi'. Fque' yub gu' mbi' loo cruz tac part cón chenen yende chó xquin mbi' ngro xo'f loon.

⁷Sya, mcàb mèn co' ñibe', no co' ndyoo ner, no co' ndyoo naa loo mèn nación Israel loo Pilat. Ndxab mèna: ―Nu' ngue no thìb ley. No texal ñibe' ley nu', ndxàalque' gath mbi' ba'. Tac ale leque mbi' mbez nac mbi' xgan'pe' Diox.

⁸Per co'se' mbìn Pilat di'sa, sate más mzyeb Pilat.

⁹Mbere Pilat, ngòo Pilat le'n palas con Jesús tedib vez. Mnibdi's Pilat loo Jesús. Ndxab Pilat: ―¿Páxe' mèn lùu, à'? Per Jesús yende cón mcàb loo Pilat.

¹⁰Le' sya, ndxab Pilat loo Jesús: ―¿Chonon indlya'stel càbl loon, à'? ¿Ché' iñeedel le' daa ndxàp con' la's niin no la's yan par ñibe'en loo mèn que' mèn lùu loo cruz? No ndxàpen con' la's niin no la's yan par ñibe'en la' mèn biil. Ne'que'de mèn lùu loo cruz.

¹¹Jesús mcàb loo Pilat. Ndxab Jesús: ―Nec thìb mod no nec tedib mod ne'ñibe'del cón chenen chele' Diox ne'nda'de lugar lool ñibe'l loon. Por cona, mbi' co' mda'xù' daa lool másque' thìb xquin mbi' ndxàp mbi' no másque' thìb xtol mbi' ndxàp mbi' leque lùu.

¹²No leque hora mcua'n Pilat mod xá mod la' Pilat bii Jesús. Per mèn co' ñibe', no co' ndyoo ner, no co' ndyoo naa loo mèn nación Israel, sate más cabii mbez yèe mèna loo Pilat. Mbez mèna: ―Chele' lùu lá' mbi' ba', indxàcte amiu lùu gobiern co' ñibe' loo mèn gulàaz mèn ciuda Rom. Tac chol mèn co' ndxàc xal thìb rey xal mbi' ba', mèna ndxàc ngolo ngola's loo gobiern co' ñibe' loo mèn gulàaz mèn ciuda Rom.

¹³Co'se' mbìn Pilat tataa ndxab mèna loo Pilat, mnibe' Pilat loo Jesús ryo' Jesús par fuer. Le' Pilat na, mdub loo asi Pilat thìb lugar le'n palas co'te' natoxcua' pis con thìb loo quèe huen, co' nee di's, di'stèe che'n mèn ciuda Rom. No di'stèe che'n mèn nación Israel lèe quèea Gabata.

¹⁴Huiza ngòc huiz vispr che'n huiz lni pasc. No co'se' ndxab Pilat loo mèn nación Israel: ―Hui' gu' nexa, Rey gu' ndxè', hora casque' ngòc rol huiz.

¹⁵Per mèna tolo ngrozèe. Cabii mbez mèna loo Pilat: ―Fcàa mbi' ba'. Beth. Fque' mbi' loo cruz. Per Pilat ndxab loo mèna: ―¡Cóna! ¿Rey gu' que'en loo thìb cruz, à'? Yende xàa. Per mèn co' ngòc jef che'n nguley' co' más ñibe' loo rye nguley' mcàb. Ndxab mèna loo Pilat: ―Ingue node nu' más rey, ey. Angoluxte jef co' ñibe' loo mèn gulàaz mèn ciuda Rom nac rey nu'. Ngolo cuent.

¹⁶Ngoloa, mnibe' Pilat loo solndad par mbe' solndad Jesús par ya que' solndad Jesús loo cruz. Le' rye mèna na, mdoo nque xís solndad par la's mèna xal que' solndad Jesús loo cruz.

¹⁷Sya, ngro' no mèna Jesús. No ale mnibe' mèna loo Jesús par leque Jesús mxo'f yen cruz Jesús par mbe' Jesús cruz Jesús axta loo den co' mbez mèn lèe Den Calaver tiempa. Le' di'stèe mèn nación Israel na, mbez mèn loo dena Golgot tiempa.

¹⁸Loo dena mque' mèn Jesús loo cruzpe' Jesús. Lomisque' ne, mque' mèn taachop mbi' loo cruz co' ngòc cruzpe' mbi', thìb thìb mbi' mquée loo cruz thìbgà' lad cuat Jesús. Le' cruz Jesús na, mdoo xtau' ryop mbi'a.

¹⁹Látha, mbli Pilat mandad mque' mèn plá di's loo yéc cruz co' ndxab: Jesús, mèn yèez Nazaret, rey che'n mèn nación Israel.

²⁰Huax mèn nación Israel mblab di'sa tac co'te' mque' mèn Jesús loo cruz nzi gax ro ciuda Jerusalén. Di'sa nac son loo di'stèe co' nac xti's mèn hebre, no di's co' nac xti's mèn grieg, no di's co' nac xti's mèn italia.

²¹Ndxab jef che'n nguley' co' más ñibe' loo rye nguley' che'n mèn nación Israel loo Pilat. Ndxab jef: ―Más huen ne'ndubtel di's ba' tatua' co' ndxab: Rey che'n mèn nación Israel. Más huen ndubl di's le' mbi' ba' ndxab: Daa nac rey che'n mèn nación Israel.

²²Mcàb Pilat loo mèna. Ndxab Pilat: ―Yende cóna. Di's co' mblin mandad mdub loo cruz ba', yende chó techei. Le'i nduble'. Ngolo cuent.

²³Co'se' ngolo mque' solndad Jesús loo cruz, mxen solndad xab Jesús. Mblec xà' solndad thìb thìb xab Jesús par ngòc che'n thìb thìb solndad xab Jesús. No mxen solndad cap co' ngòc xab dib andoo Jesús co' ngòc thìb lar' dib nol' no dib naxèn.

²⁴Ndxab solndada loo xtàa solndad: ―Ne'li rolte na' cap ndxè'. Más huen quith no na' dad loo cap ndxè' par ñee na' ñeene' chó na' gàc che'na. No tataa ngòca par mdyaa di's co' ndub loo libr co' nac xti's Diox co' mbez: Mcàa mèn thìb ned xaben par ngòc xaben che'n mèn. No loo xaben co' ngòc cap daa mdi'th no mèn dad par ñee mèna ñeene' chó gàc che'na. No tataaque' mbli solndad con'a.