Samu 89:18-46

¹⁸Ala kava neꞌmo halegutigana huno maiꞌniye. Isaleliꞌa aote vekamo kini vekatimo maiꞌniye.

¹⁹Aote vekakamoꞌa alagamuna agegekana huno ageꞌnigekaeꞌmo ina ge huka ha paiꞌnane. Nagaemo himamuꞌaꞌe vekamo lokiya vaiꞌna ateꞌnove. Nagaemo mago vekamo vayapatiꞌmo lekana paiꞌna ateteꞌna aliꞌna asaga huꞌna ateꞌnove.

²⁰Nagaemo aliꞌyaꞌnimo alisiya vekamo Neviniꞌmo kahauya huꞌna ageteꞌnaeꞌmo aote uveliletiꞌmo faleꞌna ateꞌnove.

²¹Muki afinaꞌmo himamuꞌnimo agaeteꞌmo maleteꞌnaeꞌmo lokiya vaiꞌna ategauve.

²²Kame vekaꞌamoꞌmo anonaꞌalefeꞌmo asole yaꞌmo oꞌalisigeno hosu vekamoꞌa kana yaꞌmo alino oꞌamigiye.

²³Nagaemo kame vayaꞌamo apamagisugeꞌa aulagaleꞌmo asagauꞌa aigae. Nagaemo apaini huꞌa neꞌataya vayaꞌmo kaitaꞌmo apamiguve.

²⁴Apamiguvaꞌmonanafa agaefeꞌmo ani kavaꞌmo huguve, huꞌna ha paiꞌnova geꞌnimo alagi akame huꞌna nahau huꞌna ategauve. Nagiꞌnilefeꞌmo agiꞌaleꞌmo aliꞌna asaga huꞌna ategauve.

²⁵Nagaemo alopa mopaleꞌmo yagaisiyafeꞌmo lokiya vaiꞌna ateꞌnisugeno mago ayaꞌmo solovala aniteꞌmo maleteno mago ayaꞌmo anilafateꞌmo malegaiye.

²⁶Agaemo alopa gefatiꞌmo nagaefeꞌmo keya aeno ge hunoꞌaeꞌmo, Kagaemo afoꞌnimogamo maiꞌnane. Gotiꞌnimogae, huno, nagufamo alika katika natesana yafaꞌnimo maiꞌnane, huno naha paigiye.

²⁷Yege mafaꞌneꞌnimo maiꞌniye, huꞌna hu malegauve. Agaemo muki ma mopafiꞌmo maiꞌnaya kini vayaꞌmo ago aeno apakaseno hogote kini vekamo maigiye.

²⁸Nagaemo muki afinaꞌmo nahau huꞌna atege atege huꞌna maiguve. Agaeꞌeꞌmo kotalake geꞌnimo hu maleꞌnova geꞌnimoꞌa afaꞌa hanege hanege huno hanegaiye.

²⁹Agae nofi vayaꞌamo afaꞌa maige maige huꞌa maigae. Kokuꞌnaꞌmoꞌa hanege hanege huno hanesiya kava huno muki afinaꞌmo kini vekamo maiꞌneno yagaino apategaiye.

³⁰Mafaꞌneꞌamogimo keꞌaepa geꞌnimo ataleꞌa aliꞌna fako hu maleꞌnova geꞌnimo akame osuge

³¹avoꞌmo kae maleꞌnaya geꞌnimo amagiꞌa atalege hiyo, huꞌna hapa paiꞌnova gemo akame osuge huꞌa maiꞌnisayaꞌmoꞌmo

³²nagaemo hosu kavaꞌapilefeꞌmo kayoꞌmo apamiteꞌna kayotetiꞌmo apamagisugeno apamuꞌmo apalegaiye.

³³Kayoꞌmo apamiguvaꞌmonanafa alagi aliꞌna hafaiꞌna oꞌataleꞌna agaefeꞌmo nahau nayamopafiꞌmo nahauꞌnisigeꞌna ha maegauve, huꞌna huꞌnova geꞌnimo amagiꞌna oꞌataleꞌna alagi akame huguve.

³⁴Kotalake geꞌnimo amagiꞌna oꞌataleꞌna navayafatiꞌmo hu maleꞌnova geꞌnileꞌmo alu gemo halate osuguve.

³⁵Nagaemo magoke afinaꞌmo naote kavaꞌnilefeꞌmo huꞌnaeꞌmo, Nevinifeꞌmo aigofe gemo alagi osuguve, huꞌna nagoꞌyamo ago ataleteꞌna ha paiꞌnove.

³⁶Agae nofi vayaꞌamo alagi hano osuꞌa afaꞌa maige maige huꞌa maigae. Yegemoꞌmo naulagaleꞌmo lege lege huno neꞌmaiya kava huno muki afinaꞌmo kini vekamo maiꞌneno yagaino apategaiye.

³⁷Kaimoꞌmo hanege hanege huno nehaneya kava huno fai maiꞌneno yagaino neꞌapateya sialeꞌmo muki afinaꞌmo fai maiꞌneno yagaino apategaiye. Kokuꞌnapatiꞌmo kaimoꞌmo, Gotiꞌa maiꞌniye, huno lama gemo nehiye, huno nehiya kaigana huno maiꞌneno yagaino apategaiye.

³⁸Kagaemo ani gemo huꞌnanaꞌmonanafa kagaemo ago alika yaga auka ataleteka kakameꞌyamo amiꞌnane. Kagaemo uvelimo faleka ateꞌnana vekaeꞌmo kaipamo leka ateꞌnane.

³⁹Kagaemo aliꞌyakamo neꞌaliya vekaꞌeꞌmo kotalake gemo hu maleꞌnana gemo ago alika hano huka ataleꞌnane.

⁴⁰Kagaemo kegiꞌyaꞌamo ago aeka halagape vaiꞌnane. Halagape oꞌvaisaya agufa lokiya nokoꞌmo heka halagape vaiꞌnane.

⁴¹Muki u eꞌa nehaya vayaꞌmogimo kagemi yaꞌamo kumayaꞌmo neꞌaliye. Haopaleꞌmo maiꞌnaya vayaꞌmogimo huꞌa faipa huꞌa neꞌatae.

⁴²Kagaemo kame vayaꞌamo hapa maeꞌnanageꞌa kame huꞌa aeꞌa agaseꞌnae. Hapa maeꞌnanageꞌa apamogaga aiꞌnae.

⁴³Kagaemo ati vayaꞌamo lokiya vaika oꞌapateꞌnanageꞌa kame huꞌa aeꞌa oꞌapakaseꞌnae. Kagaemo afaꞌa ataleꞌnanageno kame vayaꞌaꞌeꞌmo kame huno aeno oꞌapakaseꞌniye.

⁴⁴Kagaemo ha le konali yaꞌamo alika hano huka ataleꞌnane. Yagaino apatesiya himamuꞌamo ago alika hano huka ataleꞌnane.

⁴⁵Kagaemo ataleꞌnanageno malage huno ago kosuna leꞌniye. Lokiyaꞌamo ohaneꞌnigeno avagage kavaꞌamoꞌmo aeno ati kaeꞌniye.

⁴⁶Ala kava nene, huꞌna, na magi afinaꞌmo fala kika maigane. Muki afinaꞌmo fala kika maigapiye. Atagana huno kaipamo lesifiye.