Samu 51:4-15

⁴Nambame emba keta koo pimwaiyuo pipu doko emba iki pimwaipu. Embame koo lao masipinyi doko peparae pipu. Dokona embame koo pipi lao lare doko rolae ingyuo lare ingilyamo. Dee embame namba koo pipi lao randa jere doko rolao laresa pira.

⁵Namba endangimi manjipa nayamo dokopa koo doko namba keta paleya. Manjo neta nyepeyamo dokopa koo doko namba keta palamoko.

⁶Kinyi angi kapa dokona lenge doko emba rae mailini dokona nambana kyawa sisinginya embena mona palenge singinya renge palyuo simbwakape.

⁷Nambana koo dupwa nyuo kakondakare dokopa au pyuo keyange ingyuo pisiru. Nambana koo dupwa wate pyakarenedokopa kamame kyowao lao kopa dopakale ingyuo kararo.

⁸Namba raemaiyuo mona elyape palenge jaa doko kale katana palenale. Namba pyao inji ranji pinyi nembapinyipape namba dee kamba rae mairu.

⁹Nambana koo dupwana kanda nao lenge iminjapala nambana koo wakale wakale peparae kwuanyi nembakare.

¹⁰O Anatu, mona au pisi sinya laowasakare. Dee imambu enenge emba keta yaki nyii nao yulu pingi doko namba keta jereko.

¹¹Namba embena arapu dokona pyao neta nemba nao embena Imambu Poo Pyasi namba keta rekya lao nyuo pii nare.

¹²Embame namba pyuo nyiinyi dokona piso mona pyakalyuo pingi renge doko epenge. Doko dee range jepe. Jepala dokopa namba waa waa karo rape rape lao pingirenge jere.

¹³Dokopa enakana koo pingi dupwa nambame embena mawapii dokona lamaiyakaro dokopa nakama kapu kyuo emba keta lanyuo epenale.

¹⁴Anatu embame namba kyawa minyuo pyuo nyepe. Dokopa nambame rae maiyuo karo embena yulu rolae dokona lamaiyakao parowale.

¹⁵O Kamongo, pii mora piso nyisape. Dokopa nambame embena kingi lakandarowale.