Samu 49:4-14

⁴Dopa pyuo nambame kongwalu pii pyasi doko soo gisalena sokondali pyuo karapala renge doko rambyalu lao dokopa dokona polo larono serami.

⁵Yanda pimwai yulu koo paleta dupwame namba nyuo sukusa palyaraminyi dokopa randa eparamopa namba pakame kumuo kara naro.

⁶Wambu koo pingi mendeme isa bangena mona yukupala karara dokome mena bangepe dupwana iki range dokona ketae pyambuli lao lao kararasa pira dokona namba randa eparamo dokopa pakame kumuo kara naro.

⁷Wambumi mende koo dupwana lao baa range kapa kiiramo nyii nara. Baa rangeme Anatu keta bange mendeme ropo pyapala lete karara kapa pii nara.

⁸Renge doko akalinya koo renge dupwana bangeme ropo pyaramo dokona manda manja napala andake ingyuo pelyamo. Banya minyuo epo ropo pilyamo dupwame

⁹baa malu anda pali nao lete eparande daa. Dee dopako pyuo baa lete renge mairamo kararandedaa.

¹⁰Akali mona palenge palya nangepe dee kopetame pingipi pii nangepe peparae kumuo penge doko kandelyamano. Nakamana mena bangepe dupwa para pyaramo dupwa keta reto kumuo penge.

¹¹Dakepa yuu andape range sipyamo piso karo piminyipape rengya nakama malu pirami. Mare dokopa malu anda doko nakamana anda yuupi ingyalu ingyuo ingyaralyamo. Nakama angingyuo dokona palyuo otarami ingyara.

¹²Akalinya kamongonge renge dokome baa kuma nana lao kyawa minyarande daa. Baa mee mena suwape ingyuo kumuo para ingilyamo.

¹³Wambu rangena suupingi dokona iki pyamalyapala karaminyi dupwa keta aki rengende pilyamo lao kando karamanale. Mena bangepena angingyuo minyaro karaminyi dupwasa leto.

¹⁴Nakama mena sipisipi kumuli lapa pirami. Piraminyipa kumunginya renge dokome nakamana mena sipisipi rapu akali ingyaro karara. Wambu dasipa kumapala nakamana yanenge kakapangepe nakama rangena anda nanesa karo kumunginya yuu dokona palyuo waiya lao rumbyuo kwaeyarami. Kwaeyaraminyipa rolae pingi dupwame nakama anamasi minyarami.