4Emba rae mairinyi renge doko Kamongo keta koto karare. Dokopa embena monarena suu pilinyili pyuo jeramo karare.
5Emba Kamongo kumuo maipala baa keta pyamalyuo karare dokopa baame emba nyisara.
6Baame embena yulu rolae dupwa nyepala korakama neta renge dopale ingyuo rao eŋa nembakaramo karare.
7Koo dupwana dopa pirama lao wambu koo dupwame angingyuo lao rapa rapa yulu pyuo pirami dupwana mona nemba napala Kamongona lenge kambudokona mona sinya lao baame panda nyuo wambo pinya lao male soo karare.
8Imbwa kaeyape dee pyalana suu pyaa napipi. Mona nembo katakaeyare renge dopaleme emba nyisa nange.
9Kamongo keta pyamalyuokararami dupwa yuu range dokona nao paliraminyipa koo pirami dupwa neta nembarami ingilyamo.
10Koo pyuo kararami dupwa dusa kata serandena pana narami ingilyamo. Kararaminyi kandalana piri doko kanda nareingilyamo.
11Range pau lasi ingyuo kararami dupwa yuu dokona nakama kapa palyuo mona seramopa nao kararami.
12Akali koo pingi dokome akali keyange pingi kando pyalana suu pingi. Suu pyapalalenge polo epe kanda nao karenge.
13Dopa piramopape Kamongome akali koo pingi dupwa kando repe koo keta palyaminyi lapala giyalya giyana pyuo karenge.
14Akali koo pingi dupwame nakamana wua gela dupwa nyuo wakyuo nakamana yanda dupwa ipyapala wambu pendewa dupwa pyalana lao karaminyi. Dopako pyuo akali keyange pingi dupwa opetaeko pyao kumakalana pilyaminyi.
15Dopa piraminyipape nakamana wua gela dokome nakama range naramopa yanda dupwa mee punju para.
16Akali keyange pingi dokona bange kuki serara dupwame akali koo pingi dupwana bange malu seraraminyi dupwa isa palyuo sera ingilyamo.
17Kamongome koo pingi dupwana porai renge doko pyao bembai lanyi nembapala yulu keyange pingi dupwa yapo kame pyuo minyakamira.
18Banya letamuli pyuo warombo soo pii minyingi dupwa baame mondo lao rapu pyuo kararamopa yuu doko nakamana ingyalu ingyuo ingyara.
19Nakama randa eparamo dokopa moŋo nyii narami. Lopo seramo dokopa nakama nenge kapa seramopa koo keta pali narami.
20Koo pyuo karenge dupwa kumarami ingilyamo. Kamongo nyisu petenge wambu dupwa mee isa jingi rele lao kalya pipala mee ingyuo pao yangama yangama kopana mendeke ingyuo meeingyuo parami ingilyamo.
21Wambu kopetame pingi dupwana yulu doko bange saka napala mee yari ingyuo kee lao nyepala dee range maiyakami nange. Dopa piramopape akali keyange dokome bange mee mairamo doko ketae reto maiyuo maiyuo karara.
22Kamongo baame rae maiyuo elyape keta petenge wambu dupwa yuu dokona kapa palirami. Dopa piramopape Kamongome rae mai nara wambu dupwa yuu dokona ralinyi nembara ingilyamo.
23Kamongome akali baa apa pyuo karara kata dokona lanyuo penge. Dopa pyuo baa rae mainyi pyambuo pingi wambu dupwa kyawa minyuo karenge.
24Isa penge ramo dokopa Kamongome nyisilyasa isa puu pao paa nange.
25Namba yuu gii malu nembo kareyo doko dakepa emo kaelyo. Dopa pipunupape akali keyange mende Kamongome kyawa yaki nyiyamo kanda nayo. Dopako pyuo banya wane wanakepeme nenge jinya lao kongo pyuo kareyaminyi kanda nayo.
26Yuu peparae baame pakiki maiyuo dee yano reto maiyuoko pingi. Dopa pilyamopa banya wane wanakepe dupwa baa rae mainyi pyambungi.
27Yulu koo dupwa yaki nyuo kaepala keyange pyuo karape. Dopa pyuo karapala dokopa embena para pyarinyi dupwa yuu dokona mondo lao nao palyuo kararami.
28Kamongome yulu rolae dupwa mona nyingi. Wambu banya yulu mondo mondo lao pingi dupwa yaki nyuo kaeyara ingya nalyamo. Kamongo baame nakama kyawa minyuo karenge. Dopa pilyamopape kopetame pinginya para pyao nyerami dupwa neta nembara.
29Rolae pilyaminyi dupwa yuu range dokona mee mondo lao nao palu palirami.
30Wambu mona palengena pii doko keyange ingyuo penge. Baame laramo dupwa angi kapa dokonako lara.
31Baame banya Anatunya lowapii dupwa mona anda dokona reto minyingi. Yuu mendepe reto yaki nyuo kaeya nange.
32Akali koo dokome akali keyange doko pyalana leeminyuo karenge.
33Dopa pilyamopape Kamongo baame yanda pimwainyapawa dokona baa anamasi minyinya lao kyawa yaki nyii nara. Kote minyaramo dokopa koo pingi dokome kote pii lao wini lapala karapusi nembena lao panda mai nara.
34Kamongome keyange mende pira lao suu pilini dokona baa keta pyamalyuo karapala banya mawa pii dupwa rape rape lao minyuo karape. Dokopa yuu dokona nao karalapa lao baame porai renge jeramo karo kandare dokopa koo pingi dupwa ralinyi neta nembara ingilyamo.
35Akali koo sungwa sungwa pyuo kareya doko namba kandeyo. Baa iki londapala doloma nyuo isa palyuo karenge doko kandeyo.
36Enakana pao karo kandeyo dokopa baa dokona kara nayamo kandeyo. Koto kareyo dokopa kando nyii nayo.
37Pii dake angi mende letamo lao selapape. Wambu rolae pingi dupwana kandapala mana nyelapape. Wambu mona sinya lao piso karo pingi dokona para pyaramo dupwa nakama pisirami ingyara.