Sam 88:3-18

³Murde prtilzpele ninge nzkxpungr kxkqlu, X ycpe pipz nzbz-krnge.

⁴Mzli ka mewepex, X trpengr da kx nawaitrpem bange.

⁵Nzapusr-ngrdr ninge namz kx nzyrtzmqng mz gq. Murde krlcng tzbzpeng nzmrbrtitrpe drtwr nidr x trpengr nzrmcti-krdr nzokatr-krm.

⁶Rtcope-ngrn ninge mz gq kx vzo la, X tutx-ngrpwz nzlo.

⁷Nzngyatikr drtwrm ninge batrpzle nzetq-zlwzkr drtqnge, Mz nzmrilvzo-krde nabznge apule nrc kc tqyrplalvzo-ebir-ngrde ninge.

⁸Ngi-batrpe' nzngangrkr kztengeng ninge mz nzmwxlrti-krdr zyagox lc tqdwatimle ninge. X trpengr me nayrbqkipxx.

⁹Yawe, mzke' vaotxtrpebz mz nzyrningr mz nzvzkr drtwrnge. Kxmule-esz', a' mz zbq kang kqlu glalz-zvzbo mqnge mz nzkrka'-krbo bam.

¹⁰Bzkq rlr-ngrme nzbz-krnge Murde ma tqrblxpem bange nzyapwxtipx-krbo nim mz leplz. Murde kxnzlu-txpwzng kcng tqalebzme badr da kxnzkctipxng. X namz ngr leplz trnztulzpeung mz nzglqlz-krdr nim.

¹¹Trnzycmnetrpe-ngrdru nzaodu-zvz-krm mz nabz gq kc tqngi me nzodatingr nidr. A' nzangidati-krm nzpipxbz mz krkcng tzlubeng mz nrlc ka.

¹²X rblxpebz mz kxnzyrtzmqng nzrmc-krdr nzmyalz-esz'ngr-krm murde nzmncng mz nabz nzlo, X nivz lrm mrbrtr-alope kz mz drtwr, mz gq lr kxnzbzng.

¹³A' krka'-zvzbo bam mz zbq kang kqlu, kx Yawe, Murde nayc mz drtwrm ninge.

¹⁴A' opxm kx drtqm satrpem bange, X sc tqesablqtipeq ninge.

¹⁵Murde ayrplatxpx-zlwzq ninge, yzutr pnz mzli kc tqngi-oblabe-ngrne. X mzli ka nzetq-zvzkr drtqnge ycpe pipz nzayrkrpx-krde ninge.

¹⁶Nzngyati-zlwzkr drtwrm ninge apule nubla kc tqtwzle ninge, Mz nzbatr-krbzle nzmrbrkr nzlu-krnge.

¹⁷X nzkxpu-krnge lcng nzngrlelvzlr ninge, X trpengr me nayrbqkipxx.

¹⁸Ngi-batrpe' kztengeng kxnzmrlzng nzngangr-krdr ninge. X mzli ka nabznge talvzo zlwz mz nzmnc-krnge esz'-krnge mz nabz nzlo.