Buk Song 88:3-18

³Planti hevi i kamap long mi na long dispela as tasol klostu mi laik i dai.

⁴Mi wankain olsem ol arapela man i laik i dai. Olgeta strong bilong mi i pinis tru.

⁵Ol i lusim mi na mi stap wantaim ol man i dai pinis. Mi olsem man narapela man i kilim i dai pinis na i stap long matmat. Mi olsem ol man yu lusim tingting olgeta long ol, na i no inap yu helpim ol moa.

⁶Yu tromoi mi pinis i go long as bilong hul i daun tru, na mi stap long ples i tudak olgeta na i daunbilo tru.

⁷Belhat bilong yu i daunim mi olgeta, na i olsem biksi i karamapim mi tru.

⁸Yu bin mekim ol pren bilong mi i givim baksait long mi. Yu mekim mi i kamap nogut tru na ol i pret tumas long mi. Dispela i kalabusim mi na mi no inap lusim.

⁹Mi karim pen na ai bilong mi i bagarap na mi no inap lukluk gut. Na long olgeta de mi save beten long yu bai yu helpim mi.

¹⁰Yu save wokim ol mirakel bilong helpim ol man i dai pinis, a? Ating ol man i dai pinis i save kirap bek na litimapim nem bilong yu?

¹¹Ol lain i slip pinis long matmat, ol i save toktok long yu laikim ol tumas, o nogat? Long ples bilong bagarap ol i save tok long yu bin lukautim ol gut, a?

¹²Ating ol man i stap long matmat ol i lukim ol mirakel bilong yu? Na ol man i stap long ples bilong bagarap, ol i save lukim gutpela pasin bilong yu, a?

¹³Bikpela, mi save singaut long yu bilong yu helpim mi. Long olgeta moning mi save beten long yu.

¹⁴Tasol Bikpela, bilong wanem yu givim baksait long mi? Bilong wanem yu hait long mi?

¹⁵Taim mi yangpela yet i kam inap nau, mi bin karim pen na klostu mi laik i dai. Yu mekim save long mi na dispela i mekim bun bilong mi i slek.

¹⁶Bikpela belhat bilong yu i karamapim mi. Yu paitim mi nogut tru na bagarapim mi olgeta.

¹⁷Yu mekim olsem long mi long san na long nait wantaim, na ol man i raunim mi long olgeta hap olsem wara i tait na i karamapim olgeta hap graun.

¹⁸Yu mekim ol gutpela pren bilong mi i lusim mi. Tudak tasol i stap pren bilong mi.