Psalms 88:3-18

³Ri bo’or e oloboch nike yib ngog, nike chugur ni nggum’ riy.

⁴Gu bod gubin e pi’in ke chugur ni ngarm’ad; gelngig ni polo’ e dakuriy.

⁵Kan n’ageg u fithik’ e pi’in karm’ad; kug bod e pi’in kan li’rad karanod nga low rorad, pi’in kar mu fek an’um rorad, ni kar thaygad nga wuru’ e ayuw rom.

⁶Kam tharbageg nga t’ay e low, ko gin nrib lumor ma rib to’ar.

⁷Gelngin e damumuw rom e kug madle’ riy, kug parde’ u mirin.

⁸Kam gagiyegnag e pi fager rog ni ngar n’aged gag; kam teg ni kar tamdaggad nga ya’ag. Kan thabey nigeg ni dabyag ni gu mil;

⁹ke me’waer e changar rog ko gafgow. SOMOL, gubin e rran ma gu ma piningem ma gu ma meybil ngom ni kug tining pa’ag ngalang.

¹⁰Mog, ga ma ngongliy e maang’ang ni fan ko pi’in karm’ad? Gur, yad ma suwon ngalang ngar pininged e sorok ngom?

¹¹Mog, yima weliy u low ko yam’ e t’ufeg rom ni dabimus ara fenam yul’yul’ ko fa gin’en ni kan fek anuy riy?

¹²Gur, yibe guy e maang’ang rom ko fa gin nib lumor ara fel’ngim ko fare binaw rok e pi’in kanpag talrad?

¹³SOMOL, gu be piningem ni gu be man ayuw; gubin e kadbul ni gu ma meybil ngom.

¹⁴SOMOL, mangfan ni ga be n’igeg? Mangfan ni ga be mithag owchem rog?

¹⁵Ka nap’an ni kug bochi pagal, ni ug gafgow ngi i chugur ni nggum’; ku gu me’waer u malngin e pi gechig rom.

¹⁶Mirin e damumuw rom e ke masengseng nigeg; pi cham rom e ke kal ngog.

¹⁷Polo’ e rran ni yad ba liyegeg ni gowa ba sugbur; gubin raba’ i chireg ni karbad riy ngog.

¹⁸Mus ko pi fager rog th’abi chuchugur ma kam gagiyegnag e kar n’igedgag, kemang lumor e ku gu chagil gow.