Sam 68:4-25

⁴Naglqlzku Gct mz nzangrlvz-krgu drtqde. Na-amyalzku nide kc tqvoom mz dcbz. Drtqde Yawe x na-abrtz-ngrgu nzmnctr-krbzku mz mzte.

⁵Gct mnc Mangr-nzangiongr. Apubzle trte mz doa kxnzbzszng x aclve-kzle olvz kx nzbzszng ncblo ngrdr.

⁶Kxnzmncng esz'-krdr amnctr-lxblr-kzleng mz neidung, X kx drtqdr tropxu vzmi-kzleng Murde namnc-zpwxng. A' krkcng tzesablqtilr nide, avzpx-nrbalqleng.

⁷Mz nzrlaszkr leplz ne Gct Ijipt, vzmitrleng lzke. X mz nzmailz-krde nidr, mncpxm mz nyr x dcbz.

⁸Nide Gct r lr Israel kc tqaelwapxle zmatq ngrde mz Newz Saenae. Murde mz nzvz-krmle, nengq x tewa kxnzetung nzvz-kzpqng.

⁹Gct avzo-ngrmle tewa, Murde na-alu-moule drtc' nyzde kc tqmingrpe.

¹⁰Neidu lrde kxtrnzrngiscung amncleng mz drtc' lc, Mz nzrka-krbzle badr da kx nzmnctxpx-ngrdr.

¹¹Kxetu rgu Gct kapxle natq Kx olvz kxnzkqlung napipxlr nrpa lcde seng,

¹²“King x ami nedrng nzdwang. X nigr olvz akitikr dztu enqmi kcng tztwz ncblo ngr vea negrng.

¹³Akitikr da kxlqngi kxlqlwx kx nzwzngr mz silvz x gol. ?Myx kxmule, kzdung nimu ncblo trnzprtr-ngrdru mz vea?

¹⁴Murde Gct kc tqrninr milxtxole king kcng, X namz ngrdr nztwzbene-krdr apule lrdz kx lvxlz nrc mepz.”

¹⁵Mzli kc King Devet tqyrlq-ngrde Mzteadau nyzde mz Newz Saeon, Newz Basan apule ncblo kx angya drtwrde nzyckr Mzteadau mrlc. A' Devet ayzlubzle natqde mz nzrpi-krbzle kx, “Newz Basan, kxmule-esz' matq-esz'ngrn x myatxlzq, X nra nyzmqng ngi rtrngr,

¹⁶A' bzkq obqszoq newz kc tqmcpx Yawe kx namnc-ngrde, Murde sa namnc alo elr.”

¹⁷Gct vom mz siu ngr sariot scdeng, Mz nzprpx-krmle mz Newz Saenae x nzprtr-krde Mangr-nzangiongr.

¹⁸Kxetu vzdz-ngrde wq, X aovxiole enqmi kxkqlu. X nzkabzlr da bade, mz nzmetx-krbzlr bade, Kxmule-esz' kxnzxpqbrlr-ngrdr nide mzli kc.

¹⁹Naglqlzku Kxetu kc tqatu-amqngile nigu mz zbq kang kqlu. Murde nide Mevalu rgu.

²⁰Gct rgu nide Gct kc tqarlapxle leplz. Yawe nide Kxetu kc tqkapxmle nigu mz mq enqmi rgung.

²¹X sc tqtaputibzle nardr, Murde nzvz-rbr-zvzng.

²²Rpimle bagu kx, “Kxmule-esz' enqmi rmung nzdwalzng mz newz O drlve keng mz nzakitikr nrlc nidr, a' sa nayzlutibong.

²³Murde navznenamu mz nzrnzlvzo-krmu mepyr ngrdrng, X kuli nemqng drtwrdr naesatxpx zpwx mz nzrmnq-krdrle.”

²⁴Leplz amrlx nzmclr nzvztr-krmqng leplz neng Gct Mrkc Tqtr, Mz nzangrlvz-krdr Gct x King rdr.

²⁵Dzbe kxnzngrng nzrtwayzbzng, vz-nqblqbz olvi kx nzelang x nzayrlewzng nrasrpwale. X kxnzayrning gita nzrmnr-ngrmqng.