Pesalem 68:4-25

⁴Anam wê êpi Anôtô. Awem êôc ênê ŋaê. Anam ŋac, taŋ kêsa gamêŋ sawa naŋ, nê intêna. Ŋac tau nê ŋaê gebe Apômtau. Akô eŋ laŋônêmŋa ma anam lasê toôndugeŋ.

⁵Anôtô taŋ gêmoa nê andu dabuŋ naŋ, kêtu mosêbunêŋ tameŋi to awêtucnêŋ gêjam-sawaga.

⁶Anôtô gêjam lau sawa sa gebe têtap gôlôac sa ma kêgaboac lau kapoacwalôŋa su jasêmoa nêŋ tauŋŋa. Ma kêmasê gêsuŋtêkwa ŋatoŋwaga sa e nêŋ gamêŋ, taŋ sêŋgôŋ naŋ, kêtu keleŋ laŋgwageŋ.

⁷O Anôtô, gêdêŋ taŋ gôdi gôwê lau sa ma kôtu êsêacnêŋ ŋamata to gêdêŋ taŋ amkaiŋ kôka gamêŋ sawa tôŋ naŋ,

⁸nom kêtênêp to umboŋ kêsêwa kom kêtu Anôtônê laŋôanô kêtu awêŋa. Lôc Sinai kêtênêp kêtu Anôtô gêô lasê lôc tauŋa. Israelnêŋ Anôtô gêô lasêgac.

⁹O Anôtô, aôm kôkêŋ kom gêjac kêsêwageŋ ma kôlau nêm nomlênsêm, taŋ gelo-gelo naŋ.

¹⁰Aômnêm gôlôac têtap nêŋ gamêŋ sêŋgôŋŋa sa. O Anôtô, nêm moasiŋ kêmasaŋ gamêŋ tau kêtu lau ŋalêlôm sawaŋa.

¹¹Apômtau kêjatu sa ma lauo taêsam ŋasec sêjam wêsiŋ e ŋawae kêtu tapa.

¹²“Lausiŋ totoŋ-totoŋ to nêŋ kiŋ sêc, sêcgoc” ma lauo sêjac sam ŋawaba gêdêŋ tauŋ.

¹³Talic êsêac amboac balôsi ŋaôsic-ôsic amboac silber ma ŋawaô joŋsamuc ma ŋaôsic-ôsic amboac gold. Amacnêm lauo ŋagêdô sêmoa domba nêŋ sapa ŋalêlôm kêtu ageŋŋa.

¹⁴Gêdêŋ taŋ ŋajaŋa ŋatau Anôtô kêpa kiŋ êliŋ-êliŋ naŋ, eŋ kêkêŋ sno gêjac aŋga lôc Salmon.

¹⁵Aôm lôc Basanŋa kôtu lôc towae. Aôm lôc Basanŋa ŋatêpôê jabo-jabogoc.

¹⁶Amac lôc ŋagêdô, taŋ jabo-jabo naŋ, asageŋ têmtac ŋandaŋ gêdêŋ lôc, taŋ Anôtô gebe êŋgôŋ êtu nê gamêŋ naŋ. Biŋŋanô, Apômtau oc êŋgôŋ tônê endeŋ tôŋgeŋ.

¹⁷Anôtô gêmêŋ aŋga Sion ŋa nê kareta siŋŋa taêsam ŋalêlêma atom. Apômtau gêmêŋ aŋga Sinai mêŋgêô lasê nê gamêŋ dabuŋ.

¹⁸Aôm kôpi lôlôc jagôwê lau kapoacwalôŋa sêwiŋ aôm. Ŋamalac sêsuŋ nêŋ gêŋ gêdêŋ aôm gêwac. Gêsuŋtêkwa ŋatoŋ oc sêŋgôŋ sêwiŋ Apômtau Anôtô amboac tonaŋ.

¹⁹Aweŋ êôc Apômtau, eŋ kêsip aêac sa bêc to bêc. Eŋ Anôtô, taŋ gêjam aêac sa naŋ.

²⁰Anôtô tonaŋ tec kêtu aêacnêŋ Anôtô, taŋ gêjam aêac kêsi naŋ, ma Apômtau Anôtô eŋ ŋatau, tec oc ênam tasa paŋ lêndaŋ ôkwi.

²¹Biŋŋanô, Anôtô oc elo nê ŋacjo môkêŋapac popoc, oc ênac ŋac, taŋ kêsêlêŋ tonê secgeŋ naŋ, môkêdaŋgam popoc amboac tonaŋ.

²²Apômtau kêsôm kêtu tôŋ gebe “Aê oc jajoŋ êsêac aŋga Basan sêmu sêmêŋ. Biŋŋanô, oc jajoŋ êsêac aŋga gwêc ŋagêdimbob sa sêmu sêmêŋ.

²³Gebe ôkwasiŋ amkaiŋ êsêp nêŋ declêlôm. Nêm kêam imbeleŋ têtap nêŋ gwada aŋga ŋacjonêŋ sa.”

²⁴O Anôtô, lau sêlic nêm gôlôac ŋawalaŋ baliŋ. Sêlic ŋoc kiŋ Anôtônê walaŋ baliŋ omŋa sêmoa gamêŋ dabuŋ.

²⁵Lau sênam wê ŋa aweŋwaga têtu ŋamata, go lau, taŋ sêjac gêŋ wêŋa kêtaŋ naŋ, têtu ŋamu ma lauo takiŋ sêmoa ŋasawa togegobgeŋ.