GWAY GI IDAWUU’D 68:4-25

⁴Yuḵi gway eya Arumgimis mo. Yuḵi gway jin maŋu gway piti mo. ’Deki gway isi mis ap̱o/ a’di jin merki’da p̱owa raḵ mo. Gway piti ta Tap̱a mo. Yuḵi gway ki moŋ’kuny bwa mo ibwambori a’di mo.

⁵Ababa gi uni kun daran ki icom mo, dhali amanhil up̱ gun wuna ikaṯẖ mo tani, a’di ta’da Arumgimis jin di’d e mom piti jin ḵogu mo.

⁶Arumgimis ki c̱i uni kun dar gi gu’b mo mo mmo’ko icine/ mo. A’di ki sus ’kwani gun dhunu eya sijin e mo jin rusa/ rus mo, hili uni gun pish is ka le’d mo tani uni ’kokin e mo jin ta’da burṯa/ o’d ka burṯa/ o’d mo.

⁷Ayy Arumgimis, me’d jin yana /e ka pije/ nyaḵki ’kwanim pini mo tani dhali me’d jin yana /eya ye’th ye’th nyaḵki ’kwanim pini mo e mombwaasho mo tani, Doshi ma dhali ’cunycuri yan mo.

⁸mony’cesh yiḵinki is mo dhali momis wolki’da shoka ’cesh ’peni icine/ mo, e buŋ’kus ma Arumgimis mo. Wosh Sinaa/ c̱aan mo tani a’di yiḵinki is mo e buŋ’kus ma Arumgimis mo, a’di jin ta’da Arumgimis ma Israyiil mo.

⁹Ayy Arumgimis, /e dhalkina sho’k mmohe’th kagahara mo, /e jin wari mal pini is ka nyaŋ’ko’d mo me’d jin wuyina is a’di e mo.

¹⁰Ama’diny ḵa’bal pini uni gamki mo jin ’konu icine/ mo. E mo mii miiŋ ganam pini mo tani, ayy Arumgimis, /e ki thoson mii gom ’kwani kun dar gi to mo.

¹¹Tap̱a ḵanki gwo mo. Uni gwansan tana ris kagahara kun ḵalki gwom ’borga/ yan mo.

¹²Imaliḵ gi ’kwani ma mee mo tani uni son mo, hili uni sokin mo. Up̱ kun ’koni pa mo tani uni ḵwa/ki to jin dilu bwa mo,

¹³ba uni nyaḵ ’ko ki ḵa’bal e bwam ma goŋ mo, dhala biŋ gurko/ uni ’koshkunu is ki ’dolkon kush mo dhali jeshem piti c̱a’b ki go’d go’d me’d ’dolkona go’d go’d mo.

¹⁴Ki a’di jin ta gi Mom’bi’th ma Dem Dem c̱ekerki imaliḵ bwa mo tani awasa/ p̱u’dki’d ap̱o/ Wosha Salmuun mo.

¹⁵Ayy, wosh jin turatur jin c̱a’bki dem dem mo, jin ta wosha turga/ gi Pam Bashan mo. Ayy wosha turga/ jin ’kana ’kup̱ ki bidhi/ bidhi/ ka ris mo, jin ta wosha turga/ gi Pam Bashan mo.

¹⁶Ata hila /e mo ki en dhap̱an kan mo, ayy, wosha turga/ jin ’kana ’kup̱ ki bidhi/ bidhi/ ka ris mo, e ’kuwosh jin on ma Arumgimis bwa mo mmota mom piti mmoc̱a’bi cine/ mo? Nye, mo jin mina Tap̱a c̱a’b ki sule/ sule/ mo.

¹⁷Ki mom’bi’th ma ris shumarum kun tana dem dem mo kun ta iss ’kwanimpa ka iss ’de/ ka alip̱ mo, dhala alaap̱a p̱owa alaap̱ mo, Tap̱a pu’dki’d ’peni ’kuwosha Sinaa/ e mo jin ḵogu mo.

¹⁸/E ki poḵ wosh jin turatur mo, dhali /e ki shu uni bway uni gun bu’thkunu mo e bway pini jin yana /e mo, dhali bu’th to kun c̱inu ki me’d e bwaŋ ’kwani mo, isi kan e bwaŋ ’kwani kun pishi is ka le’d mo, wakan ki Tap̱a Arumgimis midi di e mo yan mo be.

¹⁹Mom’bor mii midi di gom Tap̱a mo, a’di jin ’de’kki ana abor ki mis isa yempa/ mo. Arumgimis a’di ta bway gi mowoṯẖ bana mo. Doshi ma dhali ’cunycuri yan mo.

²⁰Arumgimis bana a’di ta’da Arumgimis gi bway gi mowoṯẖ mo. Dhali eya Arumgimis mo tani, a’di ta Tap̱a jin cila mo jin yenu ’peni mowu mo.

²¹Hili Arumgimis midi pwaṯẖ ’kup̱ gi uni kun ta ’kup̱ ki a’di mo, dhali ayinyjwa gi ’kup̱ gi a’di jin ya’d e bway piti jin dina mii a’di i’ba/ mo.

²²Tap̱a o gwo mo ki: Aha/ mina doḵ uni ka nyaŋ’ko’d ’peni Pam Bashan mo, dhali aha/ mina doḵ uni ka nyaŋ’ko’d ’peni ḵumma/ yi’de/ jin ’kula’kul mo

²³ki um mini lam sho’k bum ka bas mo, dhali ka le’d ma ’kam bum mo tani uni mini ta gi tonṯe/ ’peni ’kwani gi ’kup̱ bum mo.

²⁴Yam pini kun ḵogu kun yana /e mo tani mishu mo, ayy Arumgimis, a’di jin ta ya ma Arumgimis pem mo, a’di jin ta’da Maliḵ pem mo, e mo jin ḵogu mo,

²⁵imanyuḵ gway kun iina bori a’di mo, dhali uni kun buḵina dheŋdhenye/ iini ’ko’d mo dhali bwaman uni mo tani nyara/ p̱ina dheŋdhenyem buni ki me’d mo.