Sam 139:2-13

²Krlzq da amrlx kcng tqalex. Kxmule-esz' mncme rlru, a' krlz-zvzq nzao-krnge drtwrnge.

³Kxmule-esz' wzx o amax, a' sa tqmc-zvzq ninge. X krlz-kaiq da amrlx kcng nartrngztibo mz zbq kxesz'.

⁴Abzo pnz mzli kc trycmneka-ngrne Nzkrlz-kai-krm natq kznike napixng.

⁵Zmatq ngrm okatrle ninge Mz nztu-ngalelvz-krde ninge.

⁶Nzkrlz-krm ninge etu zlwz. X trtakitrpwc'u nzrkrlz-krm.

⁷?Drlve kc navzkix murde trnamcwq ninge? Trpnzngr kxnamule lc murde esz'-ngrn nrlc.

⁸X kxmule-esz' vzdzx Heven, a' sc tqmncq elr. X kxmule-esz' bzx x nzyrtzmqnge, a' sc tqmnc-kzq elr.

⁹Kxmule-esz' alilvc-kzx me prkilzm nepi O me takiole,

¹⁰A' sc tqmncq elr mz nzokatr-krm ninge X nzrmailz-krm ninge mz mqm.

¹¹Kxmule-esz' mnc-kapqx mz nzlo X mz drtwrnge nrlckxngrlx nangitx nrlckxbq,

¹²A' nzlo x nrlckxbq rblx nzamnc-kapq-krdr ninge, Murde nzlo x zyzlr kxnamu-txpwzlr esz' mz nzobq-krm.

¹³Murde mzli kc tqmclq ninge mz nelz lxenge Nim txpwz kx rkrlz nzmnc-lrpipx-krmc mrlcde. Wz-ngrn dalr nrkrdrtqnge x nrvr rngeng. X amwitr-lxblr-kzqng amrlx, mz nzvz-nqblq-krde me pnz drtwrm. X kctipxx x awitx-ngrbo bam Nzlrmztio-krm ninge.