Salomore Gae 5:3-16

³No ŋaqi‐nane biac hetarapac, irec weniŋuc erâ mocwâc hepe huocmu? Â kike‐nane biac ʒurepac, irec weniŋuc sohoŋ mocwâc âtepemu?

⁴No iŋuc muhape joroc biaŋ‐nanezi meticne motâcko sicneme wefume honerâ hobu‐nane taŋtaŋ âeckewec.

⁵Eme no fahare joroc biaŋ‐nane motâc rocnehape menaneonec wokemaŋ opâ âsu biaŋzi waharâ motâc mebapane ruacnewec.

⁶Ehame joroc biaŋ‐nane motâc rocnepe e mocwâc mi domahuc biac risie rawec. No iŋuc honerâ maŋnane gâckewec. Eme basarâ mi bâfuapo, â wiracnepe micnaneo wâc mi rowec.

⁷Eme ruc bapa ŋic jaŋe hae soŋaŋkehuc juku bâfuacnurâ ʒâpâ nuhuc ŋaqi‐nane sahacne nowac rorâ bawisembiŋ. Haesacte ruc bapa ŋic jaŋe iŋuc hâcne enarembiŋ.

⁸O Jerusalemte otâfâc, no dâŋ ʒiŋuc ŋaza‐jâmbâŋkepe mananiŋ: Ŋoŋe joroc biaŋ‐nane bâfuarâ âzâcnenʒepieŋ: No ere mâretec enarekac.

⁹O ŋokac hawari biaŋ mocjaha, go fuŋne weniŋucte joroc biaŋgere manatec ŋic gâcne jaŋere sâc sirickekac? Go fuŋne weniŋucte joroc biaŋgere manatec ŋic gâcne jaŋere sâc sirickeha giedâŋ keci munârekomec?

¹⁰Joroc biaŋ‐nane e ʒâŋe mai‐ticne bâric bâricnehuc socsoc eekac, e ŋic tauseŋne tauseŋne jaŋere ŋondeŋko juhame biac ʒâŋitazo.

¹¹Qizec‐ticne i gol ematauckekicne tinac â qizec susuc‐ticne i mimiŋgeŋ â gâgâpâc, kâec kâecte suhuc iŋucne.

¹²Ʒâŋe hândâŋ jahec‐ticne i hapâ jajahec jahe opâ ruarâ sahac‐jekic ɋaɋac taeŋne eha opâmecko ŋeekopirec irec sâc.

¹³Mauc jahec‐ticne jahe mâreŋ bureŋ bakicnao ʒariŋ â wiac âsu biaŋ fuŋne fuŋne foekac irec sâc, â bipic‐ticne i wâc ʒariŋ âsu biaŋ iŋucne.

¹⁴Meombâŋ jahec‐ticne i roŋ golzi barâ fainao qânâ furi sâko birickekicne irec sâc, â fâri ombâŋ‐ticne i elefaŋte ʒuŋezi ba akic erâ fainao qânâ furi sâko jaha bohotakicne iŋucne.

¹⁵Kike jahec‐ticne i qânâ wâtuŋ gol râqâcko râepie hurâ domaekac irec sâc, â hawari‐ticne i Lebanoŋ tikionec jâmâzâc iŋucne.

¹⁶Dâŋmarac‐ticne i boc aŋacne jâmbâŋ, â sahac hawari‐ticne i biaŋne sasawa. O Jerusalemte otâfâc, joroc âgo biaŋ‐nane ere fuŋne iŋuc hâcne.