SOLOMON ENA ANE 5:3-16

³A lau be dabua vada na dokia oho, ma ede baina dokia lou toma? Aegu vada na huridia, ma ede baina hamirodia lou toma?

⁴Egu lalokau tauna imana na iduara ikouna ai e daukau, bena kudougu e hetaha.

⁵Lau na tore isi, egu lalokau tauna iduarana baina kehoa. Muro na imagu amo e hetuturu, muro ranuna na imagu kwakikwakidia amo e hetuturu dobi, iduara ikoulaina auna ai.

⁶Egu lalokau tauna iduarana na kehoa; to egu lalokau vada e raka oho, ia na lasihia. E hereva negana ai laumagu na e daure, a na tahua negana ai asina davaria, bona na boi henia negana ai ia na se haere.

⁷Gima taudia ese e davarigu, hanua ai e loa eva-eva ai; idia ese e dadabagu bona e haberogu, egu hetaru e abihaigu, maḡu igimana taudia ese.

⁸Ierusalem kekenimui e, na haḡanimuimu, egu lalokau tauna boma davaria, boma hamaoroa, uraheni ese e hamasegumu. *****

⁹Hane namo e, emu lalokau tauna ede e herea tomamu? Ede e herea tomamu dainai bena ini o haḡanimai tomamu? *****

¹⁰Egu lalokau tauna kopina na ḡoevaḡoeva bona kakakaka, gerebu-ta bogaragidiai ia mo sibona herea.

¹¹Kwarana na gold namo-hereana; ia na hui-tuma, bona huina na korema-korema, galo huina na heto.

¹²Matana na ranu badidia ai e nohomu punedia na heheto, rata ai e huridiamu, e heato ḡoevadaemu.

¹³Vahana na muramura avadia umadia na heheto, mai bonadia. Bibinana na sosana, muro ranuna na idia amo e vevemu.

¹⁴Imana na gold, e hakuboroa heḡeḡe ḡauna, mai herahera nadidia ida. Tauna na aivori, mai sapairo nadidia ida.

¹⁵Aena na bauka-bauka, nadi kurokurona na heto; hehedaikau gold-na ai e hadaidia kau. Ita-itana na Lebanon na heto; hairaina na Lebanon sidadia na heheto.

¹⁶Ena hereva na gaiho herea; lau na ura henia lalo-dikamu. Ierusalem kekenimui e, egu lalokau bunai, bona turagu bunai.