Salomore Gae 1:1-7

¹Salomore gae fekicne ʒine hâcne.

²Ei, go masugezi muducnucte enarekac. Maŋjauŋgezi waiŋ opâ sirickerâ aŋacne eekac.

³Rurua wokemaŋ opâge i âsu biaŋ‐ticnehec, â ʒâŋe biŋege i opâ âsu biaŋ irec sâc, eme naru jaŋe irec hâcne gore boc ejareekac.

⁴Jowacnutec gohec mâmâc gasackerâ ranac. O ŋicwofuŋ, go ficgao râecnuzemec, eme nâŋe gore bubiaŋ manahuc ʒeri bari enaŋmu, ehuc waiŋ opâ mumbiaŋkeeŋgopeneŋ i sirickehuc go muac baafec egarenaŋmu. Naru jaŋe gore ejareme sâcke‐jâmbâŋkekac.

⁵O Jerusalemte otâfâc, no sahac‐nane gâpâre‐bipieha sifu hawari biaŋ juekopac. Sahac‐nane i Kedaŋic jaŋere qoruc boze iŋucne, erâ Salama ŋic jaŋere fofo qoruc irec sâc.

⁶Sahac‐nane gâgâpâc irec boc mi hone sâqorecnuniŋ, ʒoaŋzi sahac‐nane rikeme iŋuc hâcne eekac. Hahac ɋafâc‐nane jaŋe aaric mana‐narembiŋ, ehuc waiŋ gie‐jeŋicte soŋaŋ râecnumbiŋte no nahacne waiŋ gie hone soŋaŋ mi epo.

⁷Joroc biaŋ‐nane, go nazac: Lamafâcge mâreŋ wena râec‐jopaekic, â guŋpiticko wena ejaretec fomanaeŋgopieŋ? No wemocte âgofâcge jaŋere lama guruo naru qâsoriekicne tinac jupemu?