Salmos 71:1-16

¹Tayta Dios, gamllamanmi guellicamö. ¡Ama pengaychöga cachaycamaychu!

²Tayta Dios, allita rurajmi canqui. Salbaycamay ari. Wiyaycallämay, yanapaycallämay ari.

³Gammi canqui gaganöpis chapämajnë. Gammi canqui pacacuna siudä, salbamajnë. Chaymi gamllaman guellicamö.

⁴Tayta Dios, pacaycamay ari mana alli runacunapita, wañuchicoj runacunapita, fiyu runacunapita.

⁵Tayta Dios gammanmi mösu cashäpita-pachapis yäracaycämö. Gammi imapitapis chapämashcanqui.

⁶Mamäpa pachancho caycashpallänami gammanga yäracaycämurä. ¡Gammi yurichimarayqui! ¡Imaypis gamllatami alabaycäshayqui!

⁷Achcajmi nogata ricamar almirasha. Ichanga gammi nogataga chapämarayqui.

⁸Goyay goyaypis gamta alabaycällarmi goyä.

⁹Auquinna captëga ama gongaycamaychu. Callpaynaj captëga ama cachaycamaychu.

¹⁰Wañuchimayta munajcunaga achcaj shuntacaycärirmi conträ parlacusha.

¹¹Paycuna ninacun: «Gaticachashpayqui chariy. Diosga cachaycushanami. Manami pipis salbangachu.»

¹²Tayta Dios, ama witicuychu nogapitaga. ¡Juclla aywaycamuy yanapämänayquipaj!

¹³¡Nogata chiquipämajcunaga quiquincuna pengayman chayachun, illgächun! ¡Noga mana alliman chayanäta munajcunataga quiquincunata mana alli chayachun!

¹⁴Nogaga gamllatami shuyaraycäshayqui. Waran-waran gamllatami alabashayqui.

¹⁵Goyay-goyay pï-maytapis willacushaj alli ruraj cashayquita, nogacunata salbamashayquita. Ichanga willapaytapis manami ushämanchu.

¹⁶Tayta Dios nogaga willacushämi fiyupa allicunata rurashayquita. «Dios japallanmi juchaynäga» nirmi willacushaj.