Pesalem 71:1-16

¹O Apômtau, aê gaê lamu aômgeŋ. Ôkêŋ aê jamoa tomajocgeŋ atom.

²Ôŋgamboac aê to ônam aê sa êtu nêm biŋgêdêŋŋa. Ôê taŋam aê ma ônam aê kêsi.

³Ôtu ŋoc poclabu jaê lamuŋa to ŋoc laimôkê ônam aê saŋa. Aôm tonaŋ kôtu ŋoc poclabu to ŋoc laimôkê.

⁴O ŋoc Anôtô, ôjaŋgo aê su aŋga lau, taŋ sêkac tauŋ su aŋga aômnêm naŋ lemeŋ. Ôjaŋgo aê su aŋga lau alôb-alôb to lêsutêna nêŋ.

⁵O Apômtau, aê kakêŋ matoc aômgeŋ. O Apômtau, aê ŋapalêgeŋ ma taêc kêka aôm.

⁶Gêdêŋ tinoc kêkôc aê su ma gasuŋ tauc gêdêŋ aôm, kasa aŋga tinocnê e aôm gôlôm aêgeŋ, amboac tonaŋ oc jalambiŋ aôm endeŋ tôŋgeŋ.

⁷Lau samob sêlic aê amboac gêŋsêga teŋ, mago aôm kôtu aêŋoc lamu ŋajaŋa.

⁸Aocsuŋ kêsuŋ aômnêm lanem sa ma gêgôm waem kêtu tapa kêtôm bêcgeŋ.

⁹Aê katu ŋamalacanôgac, tec ôtiŋ aê su atom. Ŋoc ŋaclai gêbacnê, tec ôwi aê siŋ atom.

¹⁰Gebe ŋoc ŋacjo sêsôm biŋ kêpi aê ma êsêac, taŋ sêkic ŋoc biŋ naŋ, sêjam biŋgalôm sêwiŋ tauŋ

¹¹ma sêsôm gebe “Anôtô gêwi eŋ siŋgac, ajanda eŋ e naakam eŋ tôŋ gebe ênê kêsiwaga masi.”

¹²O Anôtô, ômoa jaêc aê atom. O ŋoc Anôtô, ôlêtigeŋ mêŋônam aê sa.

¹³Êsêac taŋ sêkêŋ kisa aê naŋ, majeŋ êsa e sênaŋa ma sêsu êsêac, taŋ sebe sêkêŋ aê jandac gêŋwapac naŋ, susu e sêmoa toteŋbeleŋ ŋawapacgeŋ.

¹⁴Aê gabe jakêŋ matoc aôm endeŋ tôŋgeŋ ma jaŋgôm waem êsa êlêlêc su.

¹⁵Aocsuŋ êsôm nêm biŋgêdêŋ to nêm ŋaclai ônam ŋamalac saŋa lasê êtôm bêcgeŋ. Aê oc jasa moasiŋ tonaŋ sa êtôm atom.

¹⁶Aê gabe jasa Apômtau Anôtô nê gêŋ ŋaclai sa. Aê gabe jalambiŋ aôm taômgeŋ nêm biŋgêdêŋ.