Salamo 71:1-16

¹GUIAU e, abo ea ailogulogu oa arim eai; taba nige se hetaumaeamaeagu, nige ariariri!

²Em laulau dudurai debana eai bena u saguhaigu eo u hemaurigu; beam eai u ataiegu, eo u hemaurigu!

³Oa bena egu we’utau aba ailoguloguna, egu numa adiadidirina, egu aba mauri, paana oa egu we’utau ede, eo egu aba mia adiadidirina.

⁴Egu Eaubada e, u lebohaigu tau baaea nimana eai, tau laulau gewagewa, eo tau manamanabara nimadi eai.

⁵Paana ede oa, Guiau e, oa egu sunuma ede, egu aba awamamohoi, ma hewarigu i laoma e wauta.

⁶Ea duihasari oa arim eai egu huia labasi eai i laoma e ina wauta, sinagu bogana eai oa u abihaigu. Egu hedebasae ede oa enam huia gamagamagari.

⁷Ea hemala tatao edi aba no’o; na oa egu aba homo adiadidirina ede.

⁸Aihelahuim awagu i hemonau huia gamagari, eo em namanamari hinage asubena lohaloha.

⁹Egu huia tautaubada eai tabu u abigabaegu, ena egu adidiri i dobidobi tabu u nuagabaegu.

¹⁰Paana agu waiunu se ribaribaegu, isi se itasipoigu, se oiribagogo,

¹¹si ene, “Eaubada tau ta i lausuaraei, ta henauwatai ta toai, paana nige doga esau bena i saguhai.”

¹²Eaubada e, tabu u lausuara aririegu; egu Eaubada e, u heurama u saguigu!

¹³Isi tau hegirugu bena se hetaumaeamaeadi eo se hetauyamuidi; isuewa eo taumaeamaea bena i buburidi, isi se aipate se hebaaeagu wa.

¹⁴Na eau egu sunuma abo i otahai huia gamagamagari, oa hinage abo ea hedebasae aririem.

¹⁵Awagu eai em abidudurai abo ea ribaribaei, em abihemauri laulaudi asubena gamagamagari, paana se gamagari ariri, nige gonoana ea hasiridi.

¹⁶Guiau EAUBADA ena paipaisoa gigigigiboridi abo ea wasawasaedi; oa oabom em laulau dudurai abo ea hedebasaei.