Salmos 68:1-30

¹David we-namaked namakmalad-e-iduedga narmaksad. Bab-Dummad, dakebinne. Be-isdarmalad bela be oaisakisun. Dule-be-isdardakdimalad bela be-idu be oduurmaksun.

²Igi waa burwaba yogguddae, debayobi, Bab-Dummadi dule-isganamar-imakoed. Igi baka-gwallu soo-abin daluddae, debayobi, dule-isganamar Bab-Dummad-abin bergudoed.

³Dule-innikidamaladdi weligwale itomaloed, Bab-Dummad-asabin yeer itomaloed, weligwaledbali oichomakdemaloed.

⁴Bab-Dummadga be namakmar, E-nuggi-namaklegedgi be namakmar, mogir-billigangi-sii-nanaed-e-nug be odummomar, ¡Bab-Jehováʼgi wergumala! ¡E-asabin be namakmala!

⁵Bab-Dummad-e-neg-islidikidgi-maidi, dulemar-sergan-sated-e-babad, ome-ei-sui-burgwismalad-e-bendakedid.

⁶Bab-Dummad, dule-wilesakwaa-walagwen-gudimalad, neguya-nikuega imaked, dule-galesbukwamalad-onogedid. Dule Bab-Dummadba-ibsadisurmaladdi, napa-isganagi ambikuoed.

⁷Bab-Dummad, be Israel-dulemar-abargi-noargua, nega-dulesulidganba be idu-nadapgua,

⁸napnega giglimakdegusad, mogir dii-owidegusad, Sinaí-yala, be-abin giglimakdegusad. Deyobi, Sinaí-yala Bab-Dummad-abin gusad, deyobi, Sinaí-yala Israel-e-Bab-Dummad-abin giglimaksad.

⁹Bab-Dummad, bedi bela-belad dii-owisagusad, be-dulamar geggus-danimargua, be e-niga-ogannosad.

¹⁰Bab-Dummad, a-napagine, be-dulamar ambikusad, dule-wilegedgi be nued-binsaedgi ega napa-nued be nasiksad.

¹¹Bab-Jehová, e-gayaburba uksad, omegana mili-milibali (1,000-1,000), a-gayaburba-nued weyob sogmalad:

¹²“Reymar duurmakdemalad, sorda-bila-onomalad duurmakdemalad. E-isdarmalad-ibe-ibmar-sulesmaladi, omegan e-neggine mimidmalad:

¹³Ibmar manigi-sobarmalad, orgi-sobarmalad, mimidmalad. Ar bemardi unnila sibad-wawaad-abargi meremai gusmalad.”

¹⁴Bab-Dummad-Bela-Gangued-Nikadi, reymar-oakinnaigua, Salmón-yala-birgi dambed-sibudik-sibudik-batemaibayobi reymar-imaksad.

¹⁵Basán-yalagan, yalagan-dummagan nanaed. Basán-yalagan-e-billigan matusuli nanaed.

¹⁶Yala-dummagan, ¿ibiga be Bab-Dummad-yala-nug-imaksadgi be nobe itomala? Ar Bab-Jehová degisadegu agi mai guoed.

¹⁷Bab-Dummad-e-moli-ur-bila-onomaladi, mili-miliba mergued (1,000-1,000). A-abalagine, Bab-Jehová Sinaí-yalase nonikid, e-neg-islidikid-yaba dogenonikid.

¹⁸Bab-Dummad-Jehová, niba be nakwisgua, dule-galesmalad beba be sesa gusad. Dulemar-ibmar-bega-binsa-uksad be susad, dule-uayasulidamalad-e-ibmar be susad. Adi, be be-dulamar-abargi gudii guegar.

¹⁹¡Bab-Jehová-nug odummolesun! Bab-Dummad-anmar-abonogedi, iba-irbali anmar-bendakmaiguad.

²⁰Anmar-Bab-Dummadi, dule-bendakmaidid. Bab-Jehová-Bur-Dule-Dummad burgwed-igargi anmar-onogedid.

²¹Bab-Dummad, dule-e-isdarmalad-nonogi annaoed, e-nono-binsaed-isganabi-sediid ei sagamakoed.

²²Bab-Jehová anmarga sogsad: “Basán-akale, gannar an be-barmidagoed. Demar-mata-wilaganba gannar-naega an be-imakoed.

²³Be-naga, be-isdarmalad-e-ablisbi-moodo-guega an imakoed. Be-achumar we-ablis elomaloed.”

²⁴Bab-Dummad, be-Neg-Islidikidgi dulemar-yaryarmakmamaidi, magar dakleged. Dule-duurmakmaidi, an-Bab-Dummadgadid, an-Reygad gued.

²⁵Dule-namakmaladi idumamaid, a-yalabali, yagana gar-panderetaʼmar ogornadapid, solaba dule-gar-ogormalad nadapmogad.

²⁶Danar-bukwadgi Bab-Dummad-nug be odummomalo, Israel-wagan, Bab-Jehová-nug be ogannomalo.

²⁷Benjamín-wagan we-dulemar-iduedga nadapid, amar-yalabali, Judá-dulemar-e-dummagan bukidar nadapmogad, solanapi, Zabulón-dulemar-e-dummagan, Neftalí-dulemar-e-dummagan nadapmarmogad.

²⁸Bab-Dummad, be-gargangued be oyoge, Bab-Dummad, be anmar-bendakegala be-gangued-oyosgusadi, be oyobali.

²⁹Bese-goled-neg Jerusalén-neggweburgi-siid-ulale, reymar bega ibmar ukmaloed.

³⁰Bab-Dummad, we-ibdula-masarganbalidga sabsuli be ibmar-soge. Moli-bebe-nikad-machergan-ursilimaladga, ise-sabsuli ega be ibmar soge. Yarmar-baiganbali, moli-bebe-nikad-sapinganayob-damaladga, ise-sabsuli ega be ibmar soge. Ibmar-bela-bela-nikubiedba dulemar-sabsuli-imakdiidga, sabsuli be ibmar soge. ¡Dule-bila-onogedgi-binsadimalad be oaisakisun!