Salmos 62:1-12

¹David namakmalad-e-iduedga namaked narmaksad. Jedutúnʼye-nugadga narmaksad. Bab-Dummadginbi an neg-bogidik amied, Bab-Dummadgi an-bendakleged danikid.

²Bab-Dummadbi anga akwasailaga gued, Bab-Dummadbi bela-bela-an-bendakedid. An egi dukued amied, agala, gege an galakued.

³¿Ar sanadse bemar dule-gwensakgi yolenanai gumaloe? Galu-aimukudani-gwichiyobi, olaegala, egemaknanaiyobi, emide, bemar dule-gwensak imaknanaid.

⁴Unnila a-dule-wiogega gunanaid, e-nug-dummarba-nikad-oichogega gunanaid. Surbinsa gakansaedbina itomalad, ar e-sunmakeddi ibmar-nuedbi sogmalad, e-gwagegindina, emar-ukabsaedginbi binsadimalad.

⁵An-gwage Bab-Dummadginbi neg-bogidikid amied, Bab-Dummadginbi unnila an bensulid nikad.

⁶Bab-Dummadbi anga akwasailaga gued, Bab-Dummadbi bela-bela-an-bendakedid. An egi dukued amied, agala, gege an galakued.

⁷Bab-Dummad bela-bela-an-bendakedid, egi an wergudiid. Unnila Bab-Dummadgi an-gangued siid, an-odukuedbalid.

⁸¡Unnila Bab-Dummadginbi be bensuli gumalo! ¡Bab-Dummad-asabin be nadele, bela be-boni-nikad ega be sogo! ¡Ar Bab-Dummad, anmar-akwediidid!

⁹Dule-wilemalad baisursunna bergued, dule-mani-nikamalad baisursunna bergumogad. Ebogwad nibirgi oaidiksaele, amba ukugwaled.

¹⁰Ibmar-isganagi-mani-amilegedgi melle be binsaed galemalo, ibmar-atursalegedgi mer be binsamala. Amba ibmar-nue-bukidar-bega-mergude be dakele, mer we-ibmarginbi be binsadii gumalo.

¹¹Bab-Dummad weyob-ilagwen-sunmaksagusadi, ilabo an itosgusad: Bab-Dummadgi gangued daniye.

¹²Bab-Dummad, bede bela-bela emar-wile dakmaiye, bede dule-e-ibmar-imakedba, sogedba be naboye.