Salmos 40:1-14

¹David we-namaked narmaksad. Namakmalad-e-iduedga soglenaid. Ulubgi-abitoakwaa, Bab-Jehová-abdakdii an gusad. Ansik aibilisad, an ese-goledi, magar an-itosad.

²San-burba-bergued-galu-yagi an-onosad, nega-matagangi an-onosad. Akwasaila-birgi an-ogwisgusad, nega-nuedgi an-ogwisgusad.

³Bab-Jehová an-gwabindukugi namaked-gwapid nasiksad, e-nug-ogannoedgi-namakega an-imaksad. Deyob an-dakarmargua, bukidar dobe itodmalad, Bab-Jehováʼgi bensuli gudmalad.

⁴Dule, Bab-Jehováʼgi-bensuliguedi, Bab-Jehová egi nued binsadiid. Dule, san-dummarba-samalad-barwisodisulidi, bab-dummad-baidse-gormalad-barwisodisulidi, Bab-Jehová egi nued binsadiid.

⁵An-Bab-Dummad-Jehováʼye, ibibayobi ibmar-dakledisurmaladi be imaksa. Ibibayobi be anmargi nued binsasa. ¡Dule beyobid sulid! Aisaar an bega bela be-ibmar-imaksad sogbienad. Igi an bega sogergebele, ar gege bela bega sogleged.

⁶Bega-ibdula-uklemalad gwen be abessulid, bega-ibmar-gwag-gullemalad-ukleged gwen be abessurbalid. Unnila beba-ibsaega be an-imaksad. Bega-ibdula-ogumakar-uklegedi, isgued-eliega ibdula-uklegedi, gwen be egichissulid.

⁷A-ulale, an sogdesunnad: “Bab-Dummad, be-gardagi angi-narmakar-maiyob an danisun.

⁸Bab-Dummad, an be-sogedba ibmar-imakedi ibiyobi an yeer-itodae. Be-Igar-Mesisadi an-gwage-ulubgi an sediid.”

⁹Dule-bukidarmalad-abargi an be-igar-napiragwadgi sunmakdiid. Bab-Jehová, bedi nue an-wisid be-igarba-sunmakedi an gwen boggudisulid.

¹⁰Be-igar-napiragwadi dulemarga an gwen odukudisulid. Be-innikidaedgi, be-abonoleged-igargi, an obinmakdiid. Bipisaale, dule-bukidarmalad-abargi be-sabguedi, be-igar-napiragwadi, an gwen odukudisulid.

¹¹Bab-Jehováʼye, melle be-sabguedi be angi obano. Be nue-an-sabedgi, be-igar-napiragwadba, be an-sedii guo.

¹²Isguedi bukidar an-ebiris naid, isgued bukidarsoggu, gege na bega bela bied. Isgued angi dar nue obined, an akusunna-itogusad. Isgued an-sailagiaganba bur bule mergued, bar-gannarbaa an itosurgusad.

¹³Bab-Jehováʼye, we-isguedgi wis be an-onodage. Bab-Dummadye, gwae be an-bendakdage.

¹⁴Dule-an-obelobimaladi be obingegsae, akusunna ibmar-itogega be imake. Dule-an-oichobigudimaladi, binged-abargi duurmakemai be sae.