4Bab-Jehováʼgi be nue-wergudii sae. Ar be ibmarbina-sogdiid, Bab-Dummad bega ukoed.
5Be-ibmar-imakbied, Bab-Jehováʼga be uke. Mer be Bab-Jehováʼgi bengue, ar Bab-Jehová bega ibmar imakoed.
6Igar-maidba be-ibmar-imakedi, Bab-Dummad bega dad-ibeleryob odalogoed. Deyobi dule bela magar daknonikoed, bede, dule-napiragwadid, bede, igar-maidba ibmar-imakedid.
7Bab-Dummad-asabin bogidik-gudii be imake. E-bega-ibmar-imakedse edarbedii be sae. We-dule-ibmar-isgana-imaked nasgumai be dakele, mer be sae-itogo.
8Be-isdar-itoged na be bargae, be-sae-itoged be iege. Melle be urwe, abakalegi be neg-oichoalile.
9Ar dule-isganamar burgwemaloed. Dule-Bab-Jehováʼgi-ibmar-edarbedimaladdi, neg-nued-bonisulid ega uklegoed.
10Dule-isganamar napi-ichee gudidimalad. Ar a-dulemardi be-amidigumaloen-inigwele, gwen be-amiosurmalad.
11Ar dule-san-dummarba-imaksurmalad neg-nued-bonisulid egadga guoed, amala bela nue-nasgumaidbali, weligwar itomaloed.
12Dule-isgana dule-nuedgi sunnasur binsadaed. Dule-isgana dule-nued-dakdele, bela-bela nue-sae dakdaed.
13Degi-inigwele, Bab-Jehováʼdi dule-isganaga alloed, ar wisid, we-dulemar-bergued bato ese warmaksad.
14Dule-isganamar, dule-wilegana-oburgwega, dule-nued-nanamalad-ogilogega, e-es-suid ononanaid, e-sigumar guagwar ebisbukwamalad.
15Degi-inigwele, e-es-suid e-gwagegi yolegoed, e-warsimardi ei bibislegoed.
16Dule-nued ibmar-ichee-nikale, dule-isgana-ibmar-bukidar-nikadba, bur nuedid.
17Ar Bab-Jehová, we-dule-isganamar-e-gangued ei osulogoed. Dule-igar-inniki-imakmaladdi bendakoed.
18Bab-Jehová, dule-inniki-nanadimalad-edarbediid. A-dulemarga ibmar-uklegoedi, degisadegu egadga guoed.
19Dule-inniki-nanadimaladga ibagan-bulegan-noni-sogele, akar-guosulid. Ukud-dummad nagunonikile, mas-nika guoed.