SALMOS 21:2-11

²Tinechmacatoc tlen noyolo quinequiyaya. Quena, tinechmactili tlen nimitztlajtlaniyaya.

³Tinechsehui nitlanahuatijquetl ica miyac tlatiochihualistli, huan tinechicpahuiltijtoc se tepos cuayohuali tlen senquistoc oro.

⁴Nimitztlajtlani xinechcahuili ma huejcahuas niitztos, huan nelía tinechmacatoc se yolistli tlen huejcahuas para nochipa.

⁵Tinechpalehuijtoc ma nitlatlani miyac ica mohueyi chicahualis. Huan yeca mopampa ta, nochi nechhueyitlepanitaj, na nitlanahuatijquetl, huan nechhueyitlalíaj.

⁶Tinechtiochijtoc ica tlen huejcahuas para nochipa, huan nelhueyi nopa paquilistli tlen nijpiya pampa timocahua nohuaya.

⁷Na nitlanahuatijquetl nimotemachía ipan ta, TOTECO. Quena, nimotemachía ipan mohueyi teicnelilis ta Tlen Más tiHueyi, yeca axaca huelis nechtlanis.

⁸TOTECO, ica mochicahualis tiquinajsiti nochi mocualancaitacahua. Ica monejmatl tiquinitzquis nochi tlen mitzcocolíaj.

⁹Quema timonextis, inijuanti tlatlase moixtla queja itztosquíaj ipan se horno tlen xahuantoc. TOTECO, quema tiquintlajtolsencahuas, mocualancayo quintlamitlatis.

¹⁰Tiquintzontlamiltis hasta ininconehua huan iniixhuihua.

¹¹Yonque tlacame tlen ax cuajcualme mitzcocolíaj huan quisencahuaj tlen ax cuali mitzchihuilise, ax quisas cuali tlen moilhuijtoque.