Mboe 21:2-11

²Koroŋ ta ni leleene pa, ta kam pini kek. Koroŋ ta ni iwi u pa na, nu ruutu pini som.

³Nu mar kini mi pomboli, mi pomoozi pa koroŋ ambaimbaiŋan boozomen. Mi ur mogar milmilŋana isala uteene. Mogar tana, tiurpe pa pat gol ta iŋgeeze kat.

⁴Ni iwi u be uuli ma imbot ambai, mi nu leŋ la kalŋaana. Tana mbotŋana kini ko iseeŋge iseeŋge ma ila.

⁵Nu uuli ma ilip pa malmal, tana ni zaana biibi mi mburaana biibi, mi tomtom tiwidit uruunu.

⁶Kampeŋana ku ko imbotmbot se kini ma alok. Mi nu mbotmbot raami. Tana ni leleene ambai kat.

⁷King, ni ipase pa Yooba. Tana kosa sa ko irao be ikami ma itop na som. Pa Anutu kor kana kat itoto sua kini mbukŋana mi iurur leleene pini totomen.

⁸O king, nomom ko ikis kom koi bizin ta boozomen. Zin wal ta tiurur koi pu na, nomom woono ko irokiskis zin.

⁹Nu sombe swe mburom, nako pasaana zin kembei ta you. Pa Yooba itunu ko keteene malmal pizin mi ipambiriizi zin. Ko ikam ma you ikan zin.

¹⁰Mi lutun bizin ta boozomen tomini, nu ko kas zin ma timap lup. Tana kaimer popoŋana kizin sa ko imbot toono mini som.

¹¹Ŋonoono, zin tipaata kom, mi timbuk kom kiizi be tipasaanu. Tamen ŋgar kizin ko iur ŋonoono som.