Salmo 94:8-22

⁸Sikiyu is menge taleng wey menge tulebung, keenu kew pa ebpekesavut? Sevuta niw kun be heini:

⁹Kenè be is Megbevayà iyan mibaal te menge telinga tew wey menge mata tew? Maan is egkeǥiyen niw he kela ke kenà sikandin ebpekezineg wey ebpekaahà?

¹⁰Kenè be ebmensuwen din is menge nasyun? Maan is egkeǥiyen niw he kela ke kenà sikandin edsilut? Kenè be ebpenuruen din is menge etew? Maan is egkeǥiyen niw he kela ke kenà sikandin metau?

¹¹Netuenan te Nengazen he is ed-isipen te menge etew, ne pudu wazè din pulus.

¹²Nengazen, utew zeyzey is etew he ebmensuwen nu pinaaǥi te kebpenurua nu kandin te menge kesuǥuan nu.

¹³Ebpenuruen nu sikandin su para zuen din kelinew emun timpu te kesamuk, wey taman en te timpu te kedsiluti nu te menge lalung.

¹⁴Su kenè nu ed-engkezan, Nengazen, is menge etew he ǥaked nu.

¹⁵Siguradu he egkeuman egkehitavù is metazeng he menge kedhukum, ne ebpekeuyun kayi is langun he midtinazeng.

¹⁶Wazà duma he ebpeketavang kedì ke edsurungen a te lalung he menge etew, kekenà, iyan ke zà, Nengazen.

¹⁷Emun wazà a kenikew tevangi, ne minatey ad guntaan.

¹⁸Hein migkaǥi a ziyà te kenikew, Nengazen, he henduen be te ebpatey ad, midtevangan a kenikew su mibmahal a kenikew.

¹⁹Hein utew a nesemuki, midlig-enan a kenikew ne nelipey a.

²⁰Kenà egkehimu he edepiǥan nu is lalung he menge menhuhusey, he ebaal te supak te kesuǥuan.

²¹Nesevaha zan te kebpekidkuntada te menge metazeng, ne midhukuman dan te kemetayen is wazè dan menge salà.

²²Piru, sikew, Nengazen he Megbevayè ku, iyan ka eputè ku wey endilungè ku he vatu.