Kölfel 94:8-22

⁸Ämi mi fokun tipate me lein ekewe aramas, oupwe weweöch. Ämi mi tiparoch, inet oupwe tipachemela?

⁹Ifa usun, ewe mi förätä seling, esap püsin rongorong? Ifa usun, ewe mi föri mas, esap püsin küna?

¹⁰Ifa usun, ewe mi apwüngü chon ekewe mwü esap pwal apwüngüür? Ifa usun, ewe chon kait ngeni aramas esap silelap?

¹¹Ewe Samol mi Lapalap a silei ekiekin aramas, a silei pwe ra pön chök.

¹²Ai Samol mi Lapalap, a feiöch ewe mwän en ka amiriti, ätewe ka aiti ngeni om allük.

¹³Kopwe angasa seni an kewe riaföü, tori eu pwang a tu fän iten ekewe aramasangau.

¹⁴Iwe, ewe Samol mi Lapalap esap likitala nöün aramas, esap pwal pöütala chokewe a nöüniir.

¹⁵Angangen kapwüng epwe longolongsefäl won pwüng, nge meinisin mi wenechar lon leluker repwe tipeeu ngeni.

¹⁶Iö epwe ütä fän itei o ü ngeni ekewe aramasangau? Iö epwe nom won peki o ü ngeni ekewe chon föföringau?

¹⁷Are ewe Samol mi Lapalap esap alisiei, ngang üpwe müttir feila lon lenien sotup.

¹⁸Lupwen üa apasa, “Üpwe turula,” om tong ellet a amwöchüei, ai Samol mi Lapalap.

¹⁹Lupwen a wor chomong ai öürek, en ka achipaei o apwapwai lelukei.

²⁰En kosap fokun tipeeu ngeni ekewe soukapwüng mi ngau, chokewe mi föri mine a pwüngingau, nge ra aita ngeni pwe iei pwüngün allük.

²¹Ra chufengen pwe repwe rawangauei ekewe chon pwüng o atipisi chokewe esap wor ar tipis, pwe repwe mäla.

²²Nge ewe Samol mi Lapalap i imwei imwen maun, i ai Kot, ewe achau üa op fan.