Salmo 81:2-7

²Puuni niw is kegkanta; ipezaǥing niw is tamburin, tukara niw is utew meupiya he ebpemineǥen he menge instrumintu he zuen dan menge kuwirdas.

³Ipezaǥing niw is budyung te kedsilibra te Pista te Kebpuun te Hayag wey zuen te pista he ebeelan tew emun tuker.

⁴Su iyan heini sulunuzen te menge tig-Israel. Su suǥù heini te Megbevayà ni Jacob.

⁵Impenurù din heini he penurù te menge kevuwazan ni Jose hein midsurung din is Ehipto. Nekezineg a te laǥeng he wazè ku mekilala he edhenduen te,

⁶“Impelingkawas ku sikiyu te kegkeuripena keniyu; in-awè ku is menge meveǥat he uwiten niw.

⁷Hein egkereǥenan kew mid-umew a keniyu ne midlibri ku sikiyu. Ne ziyà te mid-elesan ku he kivel midtavak ku is umew niw. Ne migezaman ku sikiyu ziyà te serebseb te Meriba.