Salmo 79:4-11

⁴Ebpeel-elezan key wey edsudien key te menge nasyun he nekeliǥuy kenami.

⁵Keenu en buwa egkaawà, Nengazen, is pauk nu kenami? Taman en be te taman is pauk nu kenami? Eriyubriyub en be he iring te hapuy is kebpengelikud nu?

⁶Ipeehè nu is pauk nu ziyà te menge nasyun wey menge ginhedian he wazà megkilala wey medsimba kenikew.

⁷Su mibpenhimetayan dan is menge etew nu ne midezeetan dan is nasyun te menge etew nu.

⁸Kenè key kenikew siluti tenged te menge salà te menge kepuun dey. Kekenà, kenè nu en pekeuǥeta is kegkehizuwi nu kenami su wazè dey en egkehimu.

⁹Tevangi key kenikew, Megbevayà he Menluluwas dey, su wey ka mezeliǥi. Luwasa key wey peseyluwa key te menge salè dey su wey ka mevantug.

¹⁰Kenè nu itugut he ebpekekaǥi ziyà te kenami is menge etew ziyà te zuma he menge nasyun te, “Hendei en is Megbevayè niw?” Ipeehè nu kenami is penimales nu te menge nasyun tenged te kebpenhimetayi zan te menge etew nu he menge suluǥuen nu.

¹¹Pemineǥa nu is dag-es te menge etew nu he menge vihag. Edhimetayan sikandan, umbe libriya nu sikandan pinaaǥi te ǥehem nu.