Salmo 68:7-16

⁷He Megbevayà, hein mibpenguluwan nu is menge etew nu te kedhipanew ziyà te sibsivayan,

⁸nehuyung is tanà wey mid-uzan su geina te nekeuma ka, is Megbevayà te Israel. Impezayag nu is keugelingen nu ziyà te Sinai.

⁹Ne wazà kurang te uzan he imbeǥey nu, umbe nepurung mahames is memaza he tanà he imbeǥey nu ziyà te menge etew nu.

¹⁰Ne zutun med-ubpà is menge etew nu, ne tenged te keupiya nu mibeǥayan nu is menge pubri he menge etew te egkinehenglanen dan.

¹¹Nenelaan ka, Nengazen, ne impenudtul haazà te mahabet he menge vahi:

¹²“Nemelaǥuy is menge hadì wey is menge sundaru zan, ne is menge azen dan mibahin te menge vahi he tig-Israel.

¹³Minsan sikan is mibpetaǥak diyà te tudil te menge kerehidu nekezawat te vahin he menge ledawan he merepatik, he is menge pakpak dan mid-epizan te pelata ne mid-epizan te lunsey he vulawan is purù dutun te pakpak dan.”

¹⁴Hein impedsusuwey te Megbevayà he Mekeǥeǥehem sikan is menge hadì, henduen sikandan te menge ayis he midtanà diyà te Buntud he Zalmon.

¹⁵Utew mekempet is Buntud he Bashan; mahabet is menge vuvungan dutun.

¹⁶Maan is nesina heini te vuntud he mibpilì te Megbevayà he iyan ed-ubpaan din te wazà pidtemanan?