5Lalung a wey mekesesalà a puun pa te kegkeetew ku.
6Iyan egkesuatan nu is ebpuun te keputian te atey he meheǥet wey tinutuuwà he ked-ul-ulaha te hustu; umbe penurua a su wey a mehimu he uluwanen.
7Iawè nu is menge salè ku su wey a melumpiyuwi; lùlui a su wey a mebmeputì.
8Ipeǥezam nu kediey is kelipey wey keǥalew, para zuen ku ǥihapun kelipey minsan pa te henduen te edrupeten nu is menge tulan ku.
9Iawè nu is menge salè ku; penasa nu is langun he kelelalung ku.