Salmo 51:10-19

¹⁰He Megbevayè ku, lumpiyuwi nu is gehinawa ku, ne beǥayi a te veǥu wey mepezumdumahan he ǥehinawa.

¹¹Kena a kenikew segseǥa puun te etuvangan nu, ne kenè nu iawà kayi te kediey is waǥas he Mulin-ulin nu.

¹²Ilikù nu kayi te kediey sikan is kelipey he neseǥazan ku hein midlibri a kenikew. Ne veǥayi a te metinumanen he ǥehinawa.

¹³Ne zutun ibpenurù ku is menge paaǥi nu ziyà te menge mekesesalà su para mekelikù sikandan diyà te kenikew.

¹⁴He Megbevayà he menluluwas ku, libriya a te salè ku he iyan is kedhimatey, ne ebpekezaǥing a is edtudtul te kedlibriya nu kedì.

¹⁵Nengazen, tevangi a kenikew su wey a mekekaǥi te menge lalag he idalig kenikew, ne edeliǥen ku sikew.

¹⁶Kenè nu igkesuat is menge pemuhat, ne minsan pa ke ebpemuhat a ziyà te kenikew te pemuhat he edtutungen, ne kenè nu heini igkelipey.

¹⁷Is pemuhat he ebpekeveǥey kenikew te kelipey, Megbevayè ku, iyan is kenà kebpelavew wey is ked-iniyuǥi te menge salà. Ne iyan heini he kelasi te pemuhat edewaten nu.

¹⁸He Megbevayè ku, tuvazi nu is Zion, he iyan is inged he Jerusalem su igkelipey nu is kebaal kayi. Umana nu venguna sikan is menge verengbeng kayi.

¹⁹Ne zutun igkelipey nu human is hustu he menge pemuhat, ragkes en is menge pemuhat he ed-eminen edtutunga. Ne ibpemuhat en maan is tudu he menge vaka ziyà te pemuhatà he zutun ka ebpemuhata.