Mune Waŋe 51:10-19

¹⁰O Kuate, ne ye tuku ŋgamuŋgal purfeu sera sulumba ye tuku wamdus te-tiwe sa le ye ne ndo dubinam idusi.

¹¹Ne ye pitai ndayumba naŋe Tukul Guwa mata ye yai ndaya.

¹²O buk ne ye te-luka tina le ye gareyina. Taŋamba ndo ne naŋe gare maŋau ta sa le ye maŋ gare-gareki. Ye mara mindek ne ndo dubinam tuku wamdus tambi sinzaŋya.

¹³Taŋawa le ye une ŋak mbal ne tuku wam tugusek ta tumniŋgi le nane mbilka ne dubinamŋgaig.

¹⁴O Kuate, ye ndare kutuwen ta idusmba ne ye kasuryumba pasa mbol pile ndaka. Ne ye mapeyumba ye te-luka ta le ye ne tuku maŋau tiŋreknu ta idusmba mune-munekamŋgit.

¹⁵O Suŋgo, ne ye sinzaŋya le ye maŋ yiŋe miŋgembi ne tuku nyu te-duŋgi.

¹⁶Ye ne tuku atrauka agaŋmor kilmba bale farmba pasoki le ugwaig ta ne nzali ndanate.

¹⁷O Kuate, ye tuku atrau agaŋ ta ye yiŋe nyu te-ibeŋmba ne kumnemŋge mini ta ne nzalinate. Ye ŋgamuŋgal biye mbilmba ne tugum prowi ta ne ye pitaiye nda.

¹⁸Ne Yerusalem fonde kareŋnumbi te-kormba naŋe nzali dubimba Sion mbal sinzaŋniŋga le nane mine magewaig.

¹⁹Taŋamba nane tukul dubimba makau pailnu kilmba ne tuku atrauka agaŋmor ta bale farmba pasoka ugwaig le ne gare-garekamŋgat.