Salmo 47:1-5

¹Sikiyu is langun he keet-etawan diyà te menge nasyun, pelakpak kew wey ugyab kew te kedalig te Megbevayà he egkezumahan te kelipey.

²Utew telehuzen is Nengazen he iyan kes Utew Lavew he Megbevayà. Mekeǥeǥehem sikandin he hadì te tivuuk he kelibutan.

³Edhimuwen din he iyan key edumala is menge tig-Israel te menge nasyun.

⁴Mibpilì din is tanà he egkepengevilin dey, he iyan kes tanà he impehivantug te pinelanggè din he si Jacob.

⁵Dutun te kedhendiyà te Megbevayà te pinuuwè din te kedhadì, ed-ugyab is menge etew te kegkelipey zan duma is kebpezaǥing te menge vudyung.