Salmo 45:2-14

²Mahal he Hadì, iyan ka utew mezagwey te langun he menge maama, ne is menge lalag he egawas diyà te vèbè nu ebpekeveǥey te keupiyaanan te zuma he etew, su ǥeina te layun ka edtuvazi te Megbevayà.

³Inseluniket nu is ispada nu, mevurut he hadì; mekeǥeǥehem ka wey meupiya is dengeg nu.

⁴Utew meupiya is dengeg nu; mezeeǥen ka ke edsurung ka para te kedlevani nu te tutuu wey hustu he kukuman para te menge edèdaaǥen. Ne tenged te ǥehem nu ebeelan nu is egkein-inuwan he menge vaal.

⁵Pelii nu te meǥarang he menge vala te panè nu is menge pusung te menge kuntada nu. Ebpesakup kenikew is menge nasyun.

⁶Is ginhedian nu, Megbevayà, ebpedayun te wazà pidtemanan, ne metazeng is kedumelaha nu kayi.

⁷Igkesuat nu is metazeng, iyan, igkeepes nu mulà is mezaat. Umbe, mibpilì ka te Megbevayà he Megbevayè nu, ne imbeǥey zin kenikew is kelipey he lavew pa te kelipey te menge zuma nu.

⁸Is bisti nu mehemut te pehemut he mira, aloe, wey kasia. Edlenganen ka te menge musikiru te menge gelemiten te kedtukar he ziyà te seled te turuǥan nu, ne haazà he turuǥan, mahal is indayandayan duen.

⁹Nepipira zuen te dungganen he menge vahi nu is menge anak te menge hadì. Ne ziyà te egkekewanan nu, edhithitindeg is egkehimu he rayna nu he midsun-ud te elahas he lunsey he vulawan he ebpuun te Ofir.

¹⁰Sikew is ed-esewaan te hadì, pemineǥa nu is egkeǥiyen ku: lipati nu en is menge emurè nu te inged wey is menge kezuzumahi nu,

¹¹su utew ka nesuati te hadì tenged te kekempet nu. Tehuza nu sikandin su egalen nu sikandin.

¹²Is menge meǥinged diyà te Tyre, ragkes en is utew menge sepian, ebeǥayan ke zan te menge azen su wey nu mepurung sikandan meseǥipà.

¹³Utew ka mekempet keniyan te seled te turuǥan nu. Is bisti nu binurdahan te vulawan.

¹⁴Idsun-ud diyà te kenikew is mekempet he visti nu ne ed-uwiten ka ziyà te hadì. Ne is menge raǥa he edumahan diyà te kenikew edtinundug kenikew, su iyan sikandan avey nu.