Salmo 34:5-19

⁵Ebmelipayen is menge etew he edsarig diyà te kandin, ne kenè dan en egkepeel-elezan.

⁶Mibpengumew is egkaayuayu he etew te Nengazen, ne midtavak din sikandin. Midlibri zin sikandin te langun he kelised din.

⁷Ebentayan te velinsuǥuen te Nengazen is menge etew he edtahud te Nengazen, ne edlibriyen din sikandan te kezeetan.

⁸Gezami niw wey niw metueni ke sengemenu keupiya is Nengazen. Utew zeyzey is etew he midsarig te pengalang te Nengazen kandin.

⁹Sikiyu is metinumanen he menge etew te Nengazen, tehuza niw sikandin. Su is menge edtahud kandin, egkekuwa zan is langun he kinahanglan dan.

¹⁰Is menge erimaung egkehimu he egkaamin is keenen dan ne egkengevitil zan, iyan, is menge etew mulà he edangep diyà te Nengazen, kenà egkeeminan te meupiya he menge vutang.

¹¹Hendini kew is egkengesuat he mebmetau, pemineǥa a keniyu. Ebpenuruen ku sikiyu te kedtahud te Nengazen.

¹²Egkesuat kew ve he mekaangken te kelipey wey melugayad he untung?

¹³Likayi niw is kegkaǥi te mezaat wey kedtarùtarù.

¹⁴Likayi niw is mezaat he vaal, ne iyan niw veeli is meupiya. Himuwa niw is paaǥi para layun melinew is kebpekidepitè niw te zuma.

¹⁵Ebentayan te Nengazen is menge metazeng, ne ebpemineǥen din is menge pengemuyù dan.

¹⁶Piru egkuntedahan din is menge etew he ebaal te mezaat. Edèdeetan din sikandan taman te kenè en sikandan egketenuzan te menge etew kayi te kelibutan.

¹⁷Ebuyù te tavang diyà te kandin is menge metazeng, ne edtevangan din sikandan. Edlibriyen din sikandan te langun he menge kemereǥenen dan.

¹⁸Uvey is Nengazen diyà te nengepakyas, ne edlibriyen din is menge etew he naawà is perateng dan.

¹⁹Minsan mahabet is menge mereǥen he egkehitavù diyà te etew he metazeng, iyan, edlibriyen sikandin te Nengazen te langun dutun.