Salmo 19:6-14

⁶Edsilà heini ziyà te edsilaan ne edsanlep diyà te edsenlepan. Ne egkesuǥat is langun te keinit din.

⁷Is kesuǥuan te Nengazen wazè din sayep. Ne ebpekezasig heini kenita. Egkeseriǥan is menge penurù te Nengazen ne ebpekeveǥey heini te ketau te kenà metau.

⁸Hustu is menge sulunuzen te Nengazen, ne ebpekeveǥey heini te kelipey. Wazà sayep te menge suǥù te Nengazen ne ebpeketayew te isip te etew.

⁹Meupiya is kedtahud te Nengazen, ne ereg heini he ed-ul-ulahan te wazè din pidtemanan. Is kedhukum te Nengazen hustu wey metazeng.

¹⁰Ne is langun kayi edhuna pa he mahal te lunsey he vulawan, he ke và dà keenen, edhuna pa he meemis te teneb he wazè din sahug.

¹¹Pinaaǥi kayi, Nengazen, egkeleǥuyan a is suluǥuen nu. Ne emun edtumanen ku heini ne mahabet is keupiyaanan he egkekuwa ku.

¹²Usahay kenà egketuenan te etew he nekesalà sikandin. Tenged kayi Nengazen, peseyluwa a kenikew te menge salà he neveelan ku he wazè ku metueni.

¹³Ne tevangi a zaan kenikew wey a kenà mekevaal te menge salà he edtivevaan ne kenè nu ituǥut he meuripen a kayi, su para wazà igkesawey kedì ne zutun egkelikayan ku is mehabet he kelasi te kebpekesalà.

¹⁴Sikew, Nengazen, is eputè ku, wey mibelukas kedì, berakat he ebpekepenunuat kenikew is menge lalag he egkengekaǥi ku wey egkeisip ku.