SALAMO 91:1-13

¹Herea Mikamika metaina ai e nohomu tauna, Siahu-idoinai Diravana ikerukeruna ai e nohomu tauna ese

²Iehova baine hereva henia, baineto, “Egu roho-mauri gabuna bona egu kohoro; egu Dirava, na abidadama henimumu”.

³Ia ese manu-tahu tauna ena idoa amo baine harohomu mauri, mase gorerena amo baine hamaurimu.

⁴Ia ese ia hanina amo baine gorumu ahu, ia hanina henudiai emu roho-mauri gabuna ba davaria; iena heabidadama na emu kesi bona keme aurina.

⁵Hanuaboi ena hahegari na basio garilaia, dina ai e kinomu dibana danu garina basio gari;

⁶hanuaboi ai e dai hanaimu gorerena, bona dina tubua ai e kaumu hahebua-tarina danu.

⁷Taunimanima daha na ohemu ai bae keto, bona gerebu na oi imamu idibana kahana ai; a basine hakahikahimu.

⁸Matamu amo ba roha roha, kara dika taudia davadia e abimu ba itaia.

⁹Iehova na emu roho-mauri gabuna ai vada o halaoa, Herea Mikamika na emu noho gabuna bunai;

¹⁰una dainai dika ta emu ai basine kau, gorere ta emu kalaga basine hakahikahia.

¹¹Badina be ia ese ena aneru baine haduadia, emu dala iboudiai bae gimamu.

¹²Idia ese imadia ai bae abimu isi, aemu na nadi ai ba tutuhia na garina.

¹³Leona bona hekori gaigaina do ba moidia, leona natuna bona gaigai na aemu amo ba moidia tao.