Salamo 80:1-13

¹Isaraela taumiataunina e, u ataatai, oa Iosepa u woeai doha mamoe eawoina! Oa ue bawa serubim potadi eai, maram u hesinalaei

²Eparanaime, Beniamina eo Manase eai! Em gigibori u healabalebalelem eo u laoma u hemaurimai!

³Eaubada e, u hetorouioimai; matam u hesina potamai eai arinai abo ai mauri!

⁴Tauiala moutuana edi GUIAU Eaubadana e, i lau e aitea huia abo u ouyalayala em tataoyao edi uura aridi eai?

⁵Matasulu mo u mosei adi aiai, matasulu hinage u henom aririedi.

⁶U hetoromai helemai taumia edi aba alaliuliuwa; ema waiunu hinage isibom se marumaruhiemai.

⁷Tauiala moutuana Eaubadana e, u hetorouioimai; matam u hesina potamai eai arinai abo ai mauri!

⁸Aigupito eai vine esau oa u abiyama; eanua tataodi u aihenauidi, eo vine wa u umai.

⁹Tano enana u hea’a, lamna ie dobi, eo eanua maudoina i hemonau.

¹⁰Loguloguna oea tupidi i heoputawaidi, eo maruwai lailaidi lagadi aridi eai hinage;

¹¹lagadi i loloidi gabogabo eai, ini’inidi hinage se tulaedi Saga eai.

¹²Paana saha ganana u oiheguri, to taubaeawa gamagaridi uauana se losi?

¹³Sarai nuura i hebaaea eo oea suisuidi gamagaridi arinai se aibai.