Kap 80:1-13

¹Asap dakon kap kɨnda. Kap yoŋ amɨn dakon kɨla amɨn da mɨŋat amɨnyo yoyɨŋban “Saŋbek saŋbek dakon jareŋ tagɨsi” uŋun tegon da yoni. Israel dakon Sipsip Kɨla Amɨn, gak Josep dakon amɨn kabɨ sipsip baŋ yaŋ kosit yolɨsal. Bɨsitnin nandaŋ nibi. Aŋelo madep serabim bamot da binapmon kɨla amɨn madep yɨgek tɨlɨmgo mɨŋat amɨn kabɨgo do yolɨŋbɨ pɨndatni.

²Epraim ae Benjamin ae Manase da bɨkbɨgon tapmɨm madepgo nolɨki. Abɨŋ nin yokwikon baŋ tɨmɨkgi.

³Piŋkop, kalɨp egɨp egɨp tagɨsi egɨpgumaŋ uŋun aego aŋkaluk abi. Butgo ninon yɨpmaŋek yo tagɨsi aŋ nibi. Aŋek yokwikon baŋ pulugaŋ nipbi.

⁴Yawe Piŋkop Tapmɨm Ami, mɨŋat amɨn kabɨgo bɨsit gayɨŋakwa bɨsap niaŋ da butjap nandaŋ yobi?

⁵Butjap nandaŋ nimaŋaki kunam tagapno dabɨl pakbinin da jap pakbiyonin asak.

⁶Gak da yum pɨndagaki amɨn kabɨ nin da ɨleŋon ekwaŋ uŋun da abɨŋ nin dakon mɨktɨm abɨdok do emat aŋ. Uwalnin da yaŋsul aŋ nimɨŋek yanjaŋ nimaŋ.

⁷Piŋkop Tapmɨm Ami, kalɨp egɨp egɨp tagɨsi egɨpgumaŋ uŋun aego aŋkaluk abi. Butgo ninon yɨpmaŋek yo tagɨsi aŋ nibi. Aŋek yokwikon baŋ pulugaŋ nipbi.

⁸Kalɨpsigwan gak wain nap kɨnda Isip mɨktɨmon naŋ aŋapgul. Aŋek on mɨktɨmon amɨn kabɨ yolbɨ kɨŋakwa wain nap uŋun kwaokgɨl.

⁹Mɨktɨm uŋun garam aŋek kwaokbɨ kwaŋek gelɨ dubagɨsi pɨgɨwit. Pɨgakwa madepsi kwaŋek mɨktɨm kɨsi ɨlɨmɨkgɨt.

¹⁰Aŋek kabap aŋyoŋgam aŋek uŋun dakon kɨlɨŋɨ da sida kɨndap madepsi uŋun kɨsi wɨtjɨgɨt.

¹¹Uŋun dakon kɨlɨŋɨ da tap madep Mediterenian da arɨpmon kɨwit. Ae terɨ kɨnda do gɨgɨ da kwaŋek pakbi madep Yupretis da arɨpmon kɨwit.

¹²Gak mibɨlɨ nido wain pi dakon dam tuwɨlgɨl? Yaŋ agɨl do amɨn da kɨŋ ap aŋek bamɨ paŋ.

¹³Joŋ bɨt da abɨŋ paŋupbal aŋ, ae joŋ kɨlap da noŋ.