Sam 80:1-13

¹(Keke vinaravara te Asapa) Kei Agoi na Sepati tana butubutu Izireli, Mu avoso mae gami, Mu turaṉa gami Goi, Agoi na koimata tadi na Mua tinoni pu guana rovana sipi. Habotu si Goi pana uludi ri na mateana serubimi,

²Mu vata dogoro pule Nigo koari butubutu Iparemi, Benisimane, meke Manase! Vata dogoro vura nia Goi sa Mua ṉiniraṉira, mae pude harupu gami!

³Mu valeana pule gami Tamasa, Mu va dogoro ni gami sa Mua tataru variva taleosae, meke kaqu ta harupu si gami.

⁴Kei Zihova Tamasa, sa koimata pa vinaripera. Vea seunae gua si kaqu bugoro nia Goi sa vinaravara tadi na Mua tinoni?

⁵Ele va ganini gami Goi sari na tinalotaṉa, meke va napo va sokuni gami Goi Sa kapa kolomata mami.

⁶Ele va malumi Goi sari na votiki butubutu pude mae varipera nia sa mami popoa; sari na mami kana si hegehegere ni gami.

⁷Kei Tamasa tanisa Qeto Minate, Mu valeana pule gami, mu va dogoroni gami sa Mua tataru variva taleosae, meke kaqu ta harupu si gami!

⁸Ele turaṉa vura nia Goi sa butubutu Izireli pa Izipi, meke hadu pani Goi sari na votiki butubutu meke veko hobe lani gami Goi.

⁹Guana huda qurepi ta letena si gami koasa pepeso sapu ele va kalalasia Goi. Meke toqolo sage si gami osolae siṉia gami sa doduruna sa popoa.

¹⁰Guana huda nomana hola si gami sapu va aqori sari na toqere, meke aqoro pa kaurudi sari na lelaṉana sa huda vaeni sari na huda sida ululudi koari na toqere pa Lebanoni.

¹¹Sari na lelaṉana sa huda si repaha la pa volosodi rina popoa, podalae pa kolo Meditareniani meke kamo latu pa Ovuku Iuparetisi.

¹²Na vegua ke vata huari Goi sari na gobana sa popoa, ke sari na tie karovodi pu ene gua vasina si hikoi sari na vua qurepi.

¹³Kekeṉoṉo guana boko pinomo sapu neti va konekonea, meke guana kurukuru pinomo si arini sapu ṉoṉovala koasa linetelete asa.